Мемлекет басшысының тапсырмасына сәйкес былтырдан бастап «Ауыл аманаты» бағдарламасы жүзеге асырыла бастады. Шағын несиелеу бағдарламасына өтініш білдірген ауыл тұрғандарының көбісі мал шаруашылығын дамытуға қызығушылық танытып отыр.
Мал өсіруге – арнайы несие
624
оқылды

Орталық коммуникациялар қыз­ме­­тін­де өткен дөңгелек үстел бары­сында Ауыл шаруашылығы вице-ми­нистрі Ербол Тасжүреков осылай деп мәлімдеді. 

– Мал шаруашылығы саласына бе­ріл­ген микрокредиттер жалпы несие­нің 79 пайызын құрайды. Не­сиенің 4,1 пайызы өсімдік шаруа­шылы­ғына, 16,9 пайызы ауыл шаруа­шылы­ғына жат­пайтын бизнес түрле­ріне бағытталды. Қаражаттың негізгі бөлігі Жамбыл, Түр­кістан, Ақтөбе және Алматы облыс­тарына үлестірілді, – деді ол.

Айта кету керек, аталған облыстарда табысы ең төменгі күнкөріс деңгейінен төмен отбасының ең көп саны тір­келген.  

Вице-министрдің мәліметінше, «Ауыл аманаты» бағдарламасының ережесіне сәйкес, жылдық 2,5% сыйа­қы мөлшерлемесі бойынша 5 жылға дейінгі мерзімге микрокредит беру көзделген. Мал шаруашылығы сала­сын­дағы жобалар үшін микрокредит 7 жылға дейін беріледі. Микрокредит­тің ең жоғары сомасы 2,5 мың АЕК-ке тең. 

Бұдан бөлек, Ауыл шаруашылығы министрлігі «Акцепт» еншілес ком­паниясымен бірлесіп, «Ауыл аманаты» бағдарламасы бойынша микро­кредит­теудің ақпараттық жүйесін әзірлеген. Ол кредит алу үшін электрондық өті­нім беруге мүмкіндік береді. Ведомство өкілінің айтуынша, аталған жүйе Жам­был облысында іске қосылған. Жа­қын арада Ақтөбе және Алматы об­лыстарында енгізіледі.

Ұлағат БЕКБОЛАТ