«Дала қасқыры» – триллер мен драма элементтерін біріктіретін фильм. Шығармашылық топ сценарий жұмыстарына 10 жыл бұрын кірісіп, оны 2021 жылы аяқтаған. Кейін түсірілім жұмыстары басталған. Түсірілім жұмысына 100-ден астам маман қатысқан. Қауіпті трюктерді қазақстандық каскадерлер орындаған, бұған қоса Беларуссиядан арнайы мамандар да шақырылған. Фильмде жоғалған ұлын іздеген Тамара есімді әйелдің оқиғасы баяндалады.
– «Дала қасқыры» – кейіпкерлерімен, баяндалуымен ерекше фильм. Мұндағы кейіпкер әйел қатты қайғырып тұрғанымен, рухы мықты, мінезі қайсар адам. Туындының шырайын келтірген де өзі. Фильмнің халықаралық фестивальдерде жүлде еншілеуі соның дәлелі, – дейді фильмнің продюсері Әлия Меңдығожина.
Канададағы Fantasiа Film Festival фестивалінде «Дала қасқыры» фильмінің актерлері Берік Айтжанов пен Анна Старченко «Рөлді үздік орындағаны үшін» номинациясы бойынша марапатталды. Сонымен қатар фильм операторы Еркінбек Птыралиев Оскар академиясының мүшесі болды.
Бұл «Дала қасқырының» бірінші жетістігі емес. Аталған кинотуынды өткен жылы Роттердам кинофестивалінде жоғары бағаланды. Сондай-ақ Бельгияда өткен халықаралық кинофестивальда бас жүлде иеленді.