Quartz жариялаған хабарламаға сүйенген Aikyn.kz ірі банк басшысы қызметкерлерден неге кешірім сұрағанын түсіндіреді.
Джейми Даймон жалпы жиналыста бейәдеп сөздер айтқаны үшін кешірім сұрады. Бірақ қызметкерлер 5 күн кеңседе жұмыс істеуі керектігін талап етті. Фото bloomberg.com сайтынан алынды
JPMorgan Chase банкінің бас директоры Джейми Даймон компанияның жақында өткен жалпы жиналысында бейәдеп сөздер айтқаны үшін кешірім сұрады. Бірақ бас директор қызметкерлердің кеңсеге келіп жұмыс істеуі банктің маңызды саясаты болып қала беретінін мәлімдеді.
CNBC арнасына берген сұхбатында Джеми Даймон: «Мен ешқашан бейәдеп сөз айтпауым керек еді, ешқашан», – деп өз әрекетіне өкінетінін білдірді. Бұл оның Огайо штатындағы Колумбус қаласында өткен кездесуде айтқан өткір сөздеріне қатысты болды. Ол кезде Даймон қызметкерлердің гибридті жұмыс режимін қайтару туралы петициясын қолдамайтынын білдіріп:
«Маған «жұма күні қашықтан жұмыс істеу тиімді» деп айтпаңыз. Маған шайтан алғыр, бұл петицияға қанша адам қол қоятыны маңызды емес», – деген еді.
Америкалық JPMorgan Chase қызметкерлері гибридті жұмысты алып тастау саясатына қарсы шығып, оны «артқа жасалған қадам» деп бағалады. Гибридті режимде қызметкерлерге 4 күн кеңседе, бір күн қашықтан, үйінен жұмыс істеуге болатын еді. Енді ірі қаржы ұйымы бұл режимді алып тастамақшы.
JPMorgan Chase банкінің бас директоры Джейми Даймон. Бұндай адам қарамағындағы қызметкерлерге бейәдеп сөздер айтады дегенге сену қиын. Коллаж kaohooninternational.com сайтынан алынды
«Мен кеңседе бес күн жұмыс істегісі келмейтін адамдарды толықтай құрметтеймін. Бұл олардың құқығы. Бірақ компания үшін не жақсы екенін біз шешеміз, жеке қызметкерлер емес. Банк саясаты ұнамаса, олар басқа жерден жұмыс табуына болады», – деді Даймон.
Қызметкерлердің петициясында: «Бұл саясат қызметкерлерге, клиенттерге, акционерлерге және компанияның беделіне зиян келтіреді. Қоғамдық тұрғыдан алғанда, бұл көлік қозғалысы мен экологиялық ластануды арттырады, сонымен қатар әйелдерге, қарттарға, мүмкіндігі шектеулі адамдарға және күтім жасаушыларға кері әсер етеді. Бұл JPMorgan-ның әртүрлілік, теңдік және инклюзивтілік қағидаларына да қайшы келеді», – делінген.
JPMorgan дәстүрлі кеңсе мәдениетіне көшті. Фото lerner.udel.edu сайтынан алынды
Джейми Даймон өзінің көзқарасын:
«Мен петицияға қанша адам қол қойғанын ұмытып қалдым, 1 200 адам ба? Бұл қалыпты жағдай. Олардың өз ойларын білдіруге құқығы бар. Бірақ біз өз саясатымызды өзгертпейміз. Біз кеңсеге ораламыз», – деп қатаң білдірді.
JPMorgan бас директоры Джейми Даймон бейәдеп сөздері үшін кешірім сұраса да, қызметкерлерді кеңсеге толықтай қайтару туралы компания саясаты өзгеріссіз қалады.
Қызметкерлердің петициясы назарға алынғанымен, компанияның шешіміне әсер етпеді. JPMorgan қашықтан және гибридті жұмысқа шектеу қою арқылы, дәстүрлі кеңсе мәдениетіне көшуде.
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.