Қазақстан Ұлттық банкі 2025 жылғы 17 наурыздан бастап инвестициялық монетаның цифрлық баламасы – Gold Coin жобасы іске қосылатынын мәлімдеді, – деп хабарлайды Аikyn.kz.
Жаңа инвестициялық құралды «Астана» халықаралық қаржы орталығы (Astana International Exchange, AIX) биржасының Tabys мобильді қосымшасында сатып алуға болады.
Gold Coin жобасының мақсаты – Қазақстан азаматтарына заманауи технология мен цифрлық экономика жағдайында инвестициялауға және капитал жинақтауға балама көз ұсыну.
Gold Coin-ның бір бірлігі алтынның 1/20 троя унциясына тең. Оның құны Лондонның бағалы металдар нарығына қатысушылар қауымдастығы (LBMA) белгілеген алтын бағасына және сатып алу/сату күні алдындағы теңгенің АҚШ долларына шаққандағы ресми бағамына байланысты болады.
Tabys мобильді қосымшасын пайдаланушы онлайн режимінде Gold Coin сатып ала алады, оны және сатуға да, сыйға тартуға да мүмкіндік бар. Сондай-ақ 20 эквивалент (бірлік) жинақталғанда, Gold Coin-ды Ұлттық банктің аумақтық филиалдарында заттай алтын – ÚKI инвестициялық монетасына айырбастауға болады.
ÚKI инвестициялық монетасы айналымға шыққалы тұр, оны 2025 жылдың 17 наурызынан бастап сатып алуға болады.
Номиналы 100 теңгелік Au 999,9 алтынынан жасалған, салмағы 31,1 грамм/1 троя унция ÚKI инвестициялық монетасы
Инвестициялық монеталар Қазақстан Республикасының бүкіл аумағында төлемнің барлық түрі бойынша олардың номиналды құнына сай қабылдануға, банк шоттарына қабылдауға және елдің барлық банкінде аударым жасауға, айырбастауға жатады. Инвестициялық монеталар Қазақстан теңге сарайында дайындалады.
Сараптама, зерттеу мақала, күнделікті өзекті ақпаратты «Айқынның» Telegram арнасынан таба аласыз.