Ақтөбеде мүгедектігі бар мектеп оқушысын тонап кеткен 17 жастағы студентке қатысты қылмыстық іс қоғамда резонанс тудырды, – деп хабарлайды Aikyn.kz сайты КТК телеарнасына сілтеме жасап.
Оқиға ақпан айында орын алғанымен, іс тоғыз айға жуық уақыттан кейін ғана сотқа жеткен. Зардап шеккен баланың анасы Жанна Алдабергенова айыпталушының қатаң жазалануын күткен. Алайда сот студентті кінәлі деп танығанымен, оны сот залынан амнистия аясында босатты.
"Сот менің балама моральдық зиян келгенін елемеді. Балам қатты қорқып, психологиялық жарақат алды. Материалдық шығын тым төмен бағаланды. SIM-карта үшін небәрі 500 теңге. Мен заңгер емеспін, бірақ сот отырысында кінәлілер санын үштен бірге дейін қысқартып, амнистия қолдануға тырысқандарын бірден байқадым", – дейді баланың анасы.
Оқиға куәгерлері болған бейнебақылау камераларының жазбаларында 11 жастағы оқушының мектептен қайтып келе жатып, қолындағы планшетінен айырылған сәті анық көрінеді. Бұл планшет баланың есту қабілеті нашар болғандықтан, негізгі байланыс құралы ретінде қолданылған. Қылмысты жасаған студенттің жанында тағы екі досы болған, бірақ олар тергеу барысында куәгер ретінде ғана танылған.
Жәбірленуші тарап қылмыстық істі сотқа жеткізу үшін тоғыз ай бойы күрескен. Іс тек жария болғаннан кейін ғана сотқа жеткен. Анасы моральдық зиян үшін 5 миллион теңге көлемінде өтемақы талап еткен, бірақ сот бұл соманы жүз есеге дейін азайтып, айыпталушыны амнистиямен босатты. Қазір зардап шеккен тарап сот шешіміне апелляциялық шағым түсіруге ниетті.