19 қазаннан бастап Қазақстандағы сауда орындарында отандық азық-түлікпен қатар азық-түлік емес тауарларға да сөрелердің кемінде 30%-ы берілуі тиіс, – деп хабарлайды Aikyn.kz сайты.
Жаңа талап Ішкі сауда қағидаларына енгізілген өзгерістерге байланысты. Оған сәйкес, қазақстандық тауарлардың үлесі әр тауар санаты мен кіші санаты бойынша, сондай-ақ жалпы сауда нысаны бойынша есептеледі.
Отандық өнімдердің сөредегі үлесі тауардың сатып алушыға көрініп тұрған қаптамаларының саны арқылы анықталады. Яғни қазақстандық тауарлардың сөредегі саны сол сөредегі барлық тауар санына салыстырылады.
Сонымен қатар отандық өнім сатып алушыға көрінетін және қолжетімді жерге орналастырылуы керек.
Талап енді тек азық-түлікке емес, киім-кешек, тұрмыстық және басқа да азық-түлік емес отандық тауарларға да қатысты болады.
Егер белгілі бір санат бойынша қажетті көлемде қазақстандық өнім болмаса, сөредегі бос орын басқа тауарлармен толтырылуы мүмкін.
Жаңа ережелер электронды саудаға да қатысты. Маркетплейстерде қазақстандық өнімдерді ілгерілетуге арналған талаптар қарастырылған.