Алдымен Шығыс Қазақстан облысының Глубокое ауданында Құрылтай депутаты Ерлан Сайыр, Қазақстан Халық Кеңесінің мүшесі Денис Рыпаков және Ұлттық экономика вице-министрі Арман Қасенов аудан активімен кездесті. Ал Риддер қаласына жұмыс сапарымен Құрылтай депутаттары Олжас Нұралдинов пен Жұлдыз Данбаева, Көлік вице-министрі Мақсат Қалиақпаров, Денсаулық сақтау министрлігі Медициналық және фармацевтикалық бақылау комитетінің төрағасы Бауыржан Жүсіпов және Энергетика вице-министрі Ержан Ертаев келді.
Кездесулерде Мемлекет басшысының «Жаңа тарихи кезеңдегі Қазақстанның өзекті міндеттері» атты Жолдауын іске асыру, сондай-ақ өңірдің әлеуметтік-экономикалық дамуына қатысты маңызды мәселелер талқыланды.
– Бүгінде Шығыс Қазақстан қарқынды дамып келеді. Өңірде төрт жаңа аудан құрылып, екі әуежайдың құрылысы жүргізілуде. Қазақстандағы ең биік таулы көпір пайдалануға берілді, бірегей Гематология орталығы жұмысын бастады. Сонымен қатар облыс орталығында көлік жолайрығының құрылысы қолға алынды. Жүзеге асырылып жатқан бұл жобалар өңірдің XXI ғасырдағы экономикалық даму үрдістеріне сай туристік, көлік-логистикалық және цифрлық хабқа айналуына мүмкіндік береді, – деді Ерлан Сайыр.
Кездесу барысында экономиканы дамыту, инфрақұрылымды жаңғырту және халықтың өмір сүру сапасын арттыру мәселелері қаралды. Депутаттың айтуынша, алдағы үш жылда еліміз бойынша әлеуметтік инфрақұрылымды дамытуға 6,5 трлн теңге бағыттау жоспарланып отыр. Сондай-ақ осы кезеңде 70 денсаулық сақтау нысаны мен білім беру, мәдениет және спорт салаларына қатысты 50 нысан салу көзделген.
Қазақстан Халық Кеңесінің мүшесі Денис Рыпаков мәселелерді көтеріп қана қоймай, оларды шешу жолдарын іздеудің маңыздылығын атап өтті. Оның айтуынша, күн тәртібіндегі өзекті мәселелер қатарында коммуналдық және әлеуметтік инфрақұрылымды жаңғырту, ауылдарды дамыту және жастарға қолайлы жағдай жасау бар.
Риддердегі кездесуде өнеркәсіптік әлеует пен қалалық инфрақұрылымды дамыту мәселелеріне ерекше назар аударылды. Құрылтай депутаты Олжас Нұралдинов қаланың өңір мен ел экономикасына елеулі үлес қосып отырған маңызды өнеркәсіп орталығы болып қала беретінін атап өтті.
– Риддер дамып келеді, тау шаңғысы базалары салынып, инфрақұрылым жетілдірілуде. Тау-кен өнеркәсібі бұрынғысынша маңызды рөл атқарады. Сонымен қатар жылу электр орталығын жаңғырту жұмыстарын жеделдетіп, қалалық инфрақұрылымды ретке келтіру қажет, – деді депутат.
Медицина саласында көп жыл еңбек еткен Құрылтай депутаты Жұлдыз Данбаева денсаулық сақтау саласын дамыту мәселесіне ерекше тоқталды. Оның айтуынша, Риддер қаласында жуырда 200 орындық аурухана мен бір ауысымда 500 адамды қабылдайтын емхана ашылған.
Бұдан бөлек, Семейде Құрылтай депутаты Айрат Базенов, Энергетика вице-министрі Бақтияр Ілияс және Ұлттық экономика министрлігі Арнайы бағдарламалар комитетінің төрағасы Бауыржан Сыздықов «Шығыс Қазақстан өңірлік электржелілік компаниясы» АҚ ұжымымен кездесіп, Мемлекет басшысының Жолдауында белгіленген міндеттер мен оларды жүзеге асыру жолдарын түсіндірді.
Айрат Базеновтің айтуынша, электр энергиясын тұтыну көлемінің өсуі мен экономиканың кеңеюі отандық генерация қуаттарын арттыруды ғана емес, өндірілген энергияны жинақтау және сақтау жүйелерін дамытуды да талап етеді.
– Мемлекет басшысы Қазақстанның энергетикалық тәуелсіздігін қамтамасыз етуді стратегиялық міндет ретінде белгіледі. Қазір еліміз жылына 124 млрд кВт•сағ электр энергиясын тұтынады. Алдағы уақытта ішкі өндіріс сұранысты толық қамтамасыз ете алмауы мүмкін. Сондықтан электр энергиясын өндірумен қатар, оны жинақтау және сақтау мүмкіндіктерін де дамыту қажет. Бұл ретте көмір және су электр стансаларымен бірге жел мен күн энергиясын тиімді пайдалану маңызды, – деді депутат.
Кездесудің келесі маңызды бағыты халықтың нақты табысын арттыру және баға тұрақтылығын сақтау болды. Ұлттық экономика министрлігі Арнайы бағдарламалар комитетінің төрағасы Бауыржан Сыздықовтың айтуынша, Үкіметтің басты міндеті – экономикалық өсімнің әрбір отбасының әл-ауқатына оң әсер етуін қамтамасыз ету. Осы мақсатта 2027 жылғы 1 қаңтардан бастап ең төменгі жалақыны 85 мың теңгеден 110 мың теңгеге дейін көтеру жоспарланып отыр.
Ал Құрылтай депутаты Қайрат Айтуғанов Солтүстік Қазақстанда тұрғындарымен Жолдаудың басым бағыттарын талқылады. Алдымен №17 Ұлттық өркендеу орта мектеп кешенінде білім беру саласының өкілдерімен кездесу өтті. Онда білім беру инфрақұрылымын дамыту, оқыту сапасын арттыру және педагогтердің кәсіби өсуіне қолайлы жағдай жасау мәселелері талқыланды. Сондай-ақ адами капиталды дамытуға және өскелең ұрпақтың мүмкіндіктерін кеңейтуге бағытталған бастамаларға ерекше назар аударылды. Мемлекет басшысының Жолдауында айтылған «Көкшетау – Петропавл» автожолын қайта жаңғырту бастамасы өңір тұрғындарына қуаныш сыйлады.
Келесі кездесу облыстық көпбейінді ауруханада денсаулық сақтау саласының өкілдерімен өтті. Мемлекет басшысы атап өткендей, алғашқы кезеңде өңірлерде 70-ке жуық денсаулық сақтау нысанын салу жоспарланып отыр. Сонымен қатар білім беру, спорт және мәдениет салаларында 50-ге жуық нысанның құрылысы басталады.
– Денсаулық сақтау, білім беру және спорт салаларын дамыту – ең алдымен, адами капиталға, ұлт саулығына және балаларымыздың болашағына салынған инвестиция. Баршамыздың ортақ міндетіміз – Мемлекет басшысы айқындаған бастамалардың нақты жүзеге асырылуын қамтамасыз ету. Сонда әрбір азамат тұрғылықты жеріне қарамастан, сапалы әлеуметтік қызметтерді пайдалана алады, – деді Қайрат Айтуғанов.
Жолдауда көтерілген мәселелерді талқылауға арналған келесі кездесу С.Киров атындағы зауытта өтті. Кездесу барысында зауыт жұмысшылары үшін маңызды бірқатар мәселе сөз болды. Атап айтқанда, жол инфрақұрылымы мен логистиканы дамыту, елді мекендерді газдандыру, ең төменгі жалақы мөлшерін арттыру, сондай-ақ жекешелендіру жоспарларына байланысты кәсіпорынның алдағы даму перспективалары талқыланды.