Қытай қараша айының басында Тайвань маңында және Тынық мұхитының батыс бөлігінде ауқымды әскери жаттығу өткізді. Оған бір мезетте 100-ден астам әскери және жағалау күзеті кемесі қатысқан, – деп хабарлайды Aikyn.kz Reuters агенттігіне сілтеме жасап.
Тайвань қауіпсіздік қызметінің жоғары лауазымды өкілінің мәліметінше, Қытай әскери күштері жаттығу барысында басқа елдердің қарулы күштері мен қалаларына, соның ішінде Тайваньдағы нысандарға шабуыл жасау әрекеттерін пысықтаған.
Әскери жаттығуға Қытай армиясының шығыс, солтүстік және оңтүстік қолбасшылықтарының бөлімшелері жұмылдырылған. Операция барысында әскери кемелердің қозғалысы, теңіз жолдарын бақылауға алу және ықтимал қарсыластың әрекетін шектеу тәсілдері пысықталған.
Тайвань билігі бұл әрекетті аралға және өзге мемлекеттерге қысым көрсету әрекеті деп бағалап отыр. Жергілікті қауіпсіздік қызметінің өкілдері Қытайдың мұндай жаттығуларды алдын ала жарияламауы халықаралық қауымдастықтың назарын аудартпай, әскери қысымды күшейтуге бағытталған болуы мүмкін екенін айтады.
Reuters мәліметінше, әскери жаттығудың ауқымы 2025 жылы Тайваньға қарсы өткізілген «Әділет миссиясы» жаттығуынан да асып түскен. Бұл Қытайдың соңғы жылдардағы ең ірі әскери-теңіз операцияларының бірі саналады.
Жаттығу кезінде Қытай кемелері Тайваньға сырттан көмек жеткізу жолдарын шектеу және Тынық мұхитының батыс бөлігіндегі теңіз кеңістігін бақылауға алу әрекеттерін пысықтаған.
13 қарашадағы мәлімет бойынша, аймақтағы Қытай кемелерінің саны шамамен 70-ке дейін азайған. Дегенмен «Ляонин» әуе кемесін тасымалдаушы кемесі бастаған әскери топ пен басқа да әскери-теңіз күштері өңірде қалған.
Қытай билігі бұл жаттығулар туралы алдын ала ресми хабарлама таратпаған. Бейжің «Ляонин» кемесінің аймақтағы қозғалысын жоспарлы әскери қызметтің бір бөлігі деп түсіндірді.
Қытай Тайваньды өз аумағының бір бөлігі деп санайды. Ал Тайвань билігі аралдың дербес басқару жүйесін сақтап қалуды көздейді.
Соңғы жылдары Бейжің Тайвань маңындағы әскери белсенділігін арттырып келеді. Бұл жағдай аймақтағы шиеленісті күшейтіп, халықаралық қауымдастықтың алаңдаушылығын туғызып отыр.