Қазақстан автобизнес қауымдастығының ақпаратына сәйкес, 2020 жылдың алғашқы үш айында қазақстандықтар жаңа жеңіл көліктерді, жүк көліктерін және автобустарды сатып алуға 168 млрд теңге жұмсаған екен.
Бұл дегеніміз – Қазақстанның автонарығы осы жылдың қаңтар-ақпан айларында қалыпты сауда тұрақтылығын көрсетті. Себебі наурыз айының өзінде 40 пайыздық өсімге жетіпті. Қауымдастықтың хабарлауынша, жалпы бірінші тоқсанда ел бойынша 17 846 көлік сатылған.
«Күткеніміздей, наурызда көлік сатылымы 40 пайыздық өсімді көрсетті. Ең бірінші кезекте халықтың автокөлікке деген сұранысы және ұлттық валютаның әлсіреуі аясында сатып алушылардың бағаның өсіп кетуінен қауіптенуі себеп. Әйтсе де, наурыз айының соңында елде карантин жарияланып, мамандандырылған ХОҚ-тар жабылып қалғандықтан, көлік тіркеу жүйесі жұмысын тоқтатты. Мемлекет қазіргі таңда көліктерді онлайн режимде тіркеуге өткізіп, диллерлерді жігерлендіруге барын салуда. Сәуір автобизнес үшін оңайға түспейін деп тұр», – дейді Қазақстан автобизнес қауымдастығының вице-президенті Анар Мақашева.
Алғашқы тоқсанда Қазақстанда ең көп сатылған брендтердің төрттігіне Lada (3 539), Hyundai (3 094), Toyota (2 653), Ravon (1 873 авто) кірді.
