Apple бағасы арзандау жаңа смартфонын нарыққа шығарады. Жаңа өнімнің атауы – iPhone SE. Смартфон дизайны осыған дейін шыққан IPhone 8-ге ұқсайды.
Apple өнімдерінің бағасын кез келгеннің қалтасы көтермейді. Компания жаңа өнімін ұсынғанда міндетті түрде сауалнама жариялайды. Көпшілігі смартфон бағасы жайында шағымданатын-ды. Осының бәрін ескере келе, компания iPhone SE смартфонын таныстырды. Иә, қалта телефонының бағасы шамамен 399 доллар.
Смартфон 4,7 дюймді Retina дисплейімен және 12 мегапиксель камерамен жабдықталған. Экранда батырмасы және Touch ID саусақ сканері бар. Естеріңізде болса, компания iPhone 10 және iPhone 11 смартфондарын экрандағы батырмасыз шығарған еді. Жаңа iPhone SE процессоры соңғы iPhone 11 Pro-ға ұқсайды. Яғни, смартфонда A13 Bionic процессоры бар.
Айта кетерлігі, гаджеттің құрылымы IPhone 8 смартфонымен бірдей. Батарея қуаты да шамалас. Сондай-ақ оны сымсыз адаптер арқылы да қуаттауға болады. Қуантарлығы, iPhone SE-ге жаңа екі sim-карта сала аласыз. Жадына келсек, үш түрі бар – 64, 128 және 256 гигабайт. Сатылымға қара, ақ және қызыл түсте шығады.
