Осы мәселеге байланысты Шымкент қаласы әкімінің бірінші орынбасары Ербол Садыр БАҚ өкілдеріне арнайы сұхбат берді. Ол қаладағы жағдай мен атқарылып жатқан шаралар туралы айтты. Ол алдымен қаладағы бүгінгі эпидемиологиялық ахуалға тоқталды. Оның айтуынша, қазір Шымкент қаласында тек коронавирус емес, ЖРВИ (жедел респираторлы вирустық инфекция) мен пневмония өршіп тұр. Сондықтан қала басшылығы күнделікті нақты жоспарлы жұмыстарды жасап жатыр. Ал пандемиямен ауырғандар саны 2 300-ге жеткен. Оның ішінде кешегі күні науқасқа шалдыққан 116 адам тіркелді. «Науқастар санының күрт өсуіне байланысты жедел жәрдем қызметін күшейтуге пәрмен бердік. Дәл қазір 100 бригада толықтай жұмыс істеуде. Одан бөлек, диспетчерлік қызметті ұлғайтып отырмыз. Соңғы талдауларға үңілсек, жедел жәрдем қызметіне 1 маусымда бір тәуліктің ішінде 1 091 шақырту болса, 10 маусымда 1 200-ден асқан, ал кешегі күні шақырту 1 850-ге жеткен. Бұл медициналық шақыртулардың басым бөлігі – ЖРВИ және пневмониямен ауырған науқастар», – деді қала әкімінің бірінші орынбасары. Оның айтуына қарағанда, мегаполисте карантин және провизорлық стационар күшейтіліпті. Себебі осыдан 5 күн бұрын қосымша енгізген 650 төсек-орын бүгінде толып қалды. «Кешегі күні реабилитацияға қосымша 100 төсек-орын ұйымдастырдық. Бұл ретте карантин стационарында болған екі нысанды 380 төсек-орынмен провизорлық стационар етіп қостық. Бұл провизорлық стационарда емдеу шаралары кезінде үш топқа бөліп, арнайы алгоритм жасадық. Ал кері байланыстағы қауіпті топтағы азаматтарға күнделікті телефонмен хабарласып отырмыз. Айта кетейік, бұл стационарлар коронавирустың жеңіл түрімен ауырған азаматтарды емдеуге арналған», – деді Е.Садыр.
Ербол Әбілхайырұлы қалада пневмониямен ауырған науқастар саны 7,2 пайызға өскенін атап өтті. Енді қала әкімдігінде күрт өскен бұл дертті ауыздықтау бойынша қарқынды жұмыс жүргізіліп, қала әкімінің тапсырмасымен қосымша ғимараттар ашылмақ.
Айта кетейік, билік өкілі қазіргі таңда ауруды өткізіп алған науқастардың өлім көрсеткіші өсіп жатқанын жеткізді. Мәселен, бір күннің ішінде ауыр жағдайда келген 8 науқас көз жұмған. «Мұның көпшілігі – бұрыннан созылмалы аурулары бар азаматтар. Осыған байланысты провизорлық стационарлар күшейтілді. Дәрі-дәрмектің барлығы толық жеткілікті. Бұл жағдайды бақылауда ұстап, жақсарту мақсатында жергілікті бюджеттен 25 ИВЛ (өкпенің жасанды желдету аппараты) аппаратын алдық. Бүгінде 301 ИВЛ аппараты бар. Одан бөлек, жатақханаларға демеушілердің көмегімен 6 ИВЛ аппараты қойылды. Бұл ретте демеушілердің тарапынан 100 мың бетперде мен кислородпен демалатын 100 Боброва аппараты келе жатыр», – деді Е.Садыр.
Арнайы сұхбат барысында қала әкімінің бірінші орынбасары қалада эпидемиологиялық жағдайдың нашарлауына байланысты 23 маусымнан бастап шектеу шаралары күшейетінін де жеткізді.
Сонымен қатар қала әкімінің бірінші орынбасары қала тұрғындарының карантин ережелерді сақтамай отырғанына ренішін білдірді. «Өздеріңіз де әлеуметтік желілерден көріп жатқандай тұрғындар той-томалақ өткізуде. Негізі әрбір азамат өз өміріне өзі жауапты. Ал біз кінәні басқа біреуден іздейміз. Бүгінгі дәрігерлер тәулік бойы демалыссыз жұмыс істеуде. Сол себепті ауру ошақтарында жүрген соң, олардың 20 пайызы ауырып қалуда. Осыған байланысты ауруханаларды таза және лас зоналарға бөлдік. Өйткені дәрігерлерді сақтауымыз керек. Сондай-ақ ақ халаттылардың орнын алмастыратын қосымша мамандардың тізімін жасап жатырмыз. Бір айта кететіні, егер біз санитарлық нормаларды сақтамасақ, дәрігерлерді де сақтай алмаймыз. Осыны түсінуіміз керек» деп күйінді ол.
Назгүл НАЗАРБЕК
