Оралда қос құрсақты жас ана егіз босанды. Бірақ үшбу егіздер бір-бірінен екі жарым ай айырмашылықпен жарық дүниеге көрінді. Батыс Қазақстан облыстық перинаталды орталық директорының орынбасары Есет Ерәлиннің сөзіне қарағанда, мұндай анатомиялық ерекшелікпен босану фактісі 50 миллион әйелдің біреуінде ғана ұшырасатын көрінеді.
Ерлі-зайыпты Сергей мен Лилия Коноваловтардың енді үш перзенті бар. Жеті жасар тұңғыш қыздары Алинаның бауырларының есімі – Лия және Максим. Үш перзенттің анасы Лилия бір емес, екі жатыры бар екенін 19 жасында профилактикалық тексеру кезінде кездейсоқ білген. Ол кезде дәрігерлер бала көтеруде мәселе туындауы мүмкін екенін ескерткен көрінеді. Сөйте тұра Лилияның айтуынша, осыдан жеті жыл бұрынғы жүктілігі еш ауытқусыз өтіп, айы-күні жеткенде тұңғыш перзентін өмірге әкелген. Ал енді егіздердің алғашқысы Лия биылғы 24 мамырда 850 грамм салмақпен, ал Максим 2 келі 800 грамм салмақпен тоғызыншы тамызда мына жарық дүние, жарқын өмірдің есігін ашқан.
– Лилия Коновалова облыстық перинаталды орталыққа жүктіліктің 25-аптасында толғақпен түсті. Мерзімінен бұрын қыз баланы өмірге әкелді. Жүктілік кезеңі ауытқусыз өткендіктен, ең бастысы, ана мен сәбидің жағдайы жақсы болғандықтан, екінші бөпені сақтап қалуды жөн санадық. Бүгіндері ананың да, егіздердің де жағдайы жақсы. Қазақстан бойынша дәл осындай патологиялық жағдайда дені сау егіздердің жарық дүниеге келуі тұңғыш рет тіркеліп отыр, – дейді БҚО перинаталды орталық директорының орынбасары Есет Ерәлин. Ал қос сәбиін бауырына алған бақытты ана БАҚ өкілдері арқылы кәсіби біліктілік танытқан ақ желеңді абзал жандарға алғысын білдірді.
Бауыржан ФАЙЗОЛЛАҰЛЫ,
Батыс Қазақстан облысы