Бұл – отандық кезекті киносымақтың сценарийі емес. Оқиға 24 қыркүйекте FlyArystan рейсінде болыпты. Жолаушылардың бірі айналасындағы көршілеріне тіл тигізіп, экипаж мүшелерімен сөзге келеді. Бетперде киіп, орнына отыру туралы талапты орындамаған. Керісінше, былапыт сөйлеп, доқ көрсете бастайды. Оның үстіне, өзі Алматы – Ақтау бағытына билет алса да, шын мәнінде Шымкентке ұшуы керегін айтып, ұшақтың есігін ашуға талаптанған.
Жолаушылардың тәртіпке қайшы іс-қимылдарының алдын алу және жолын кесу нұсқамасына сәйкес, бортсеріктер «шектегіштер» көмегімен жанжалқорды матап тастайды. Бірақ ол қолын босатып алып, бортсерік қыздың мойнынан шап беріп, қылқындыра жөнелген. Мұны көрген жолаушылар көмекке келеді, абырой болғанда арасында әуесқой спортшылар бар болып шықты. Олар экипаж мүшелеріне тентекті тәртіпке келтіруге және жол бойы оны қалт етпей күзетуге көмектесіпті. Ұшақ Ақтауға қонғанда қаскүнем жолаушы полиция органдарына тапсырылды.
Ұшу қауіпсіздігін қамтамасыз етуге жәрдем көрсеткені үшін алғыс ретінде авиакомпания Нұрлан Боқанов пен Манас Тұрабековке ұшақ моделі түріндегі кәдесыйды және FlyArystan билеттерін сатып алуға ваучерлерді тарту етті.
Air Astana тобының статистикасы бойынша, жыл сайын жолаушылардың ұшақ ішінде бүлік шығаруының шамамен 400 оқиғасы тіркеледі. Яғни, күн сайын бір оқиға болып тұрады. Рас, оның ішінде тек 20-25-і ғана салмақты деп танылады және күш қолданылады.
