Онда «Трансшекаралық өзендерден суармалы кезеңдегі қажетті сумен қамтамасыз ету барысындағы қалыптасып отырған жағдай туралы» мәселе қаралды. Жиынға «Аграрлық сектор» бағыты бойынша комиссияның кураторы, облыстық мәслихаттың депутаты Махамбет Дүйсембаев төрағалық етіп, Жамбыл облысы әкімдігінің ауыл шаруашылығы басқармасы басшысының орынбасары Ерлан Кулкеев хабарлама жасады.
Баяндамашының айтуынша, Жамбыл облысының жер үсті су ресурстары Шу, Талас және Аса өзендерінің бассейндерінде шоғырланған. Алғашқы екі өзен толығымен Қырғыз Республикасының аумағынан түседі, ал Аса өзеніне қосылатын Күркіреусу өзені де Қырғыз Республикасының аумағынан, яғни облыстың жер үсті су ресурстарының 80 пайызы көрші мемлекеттің трансшекаралық өзендерінен түседі екен. Қырғыз Республикасы Шу және Талас өзендері бойындағы бірлесіп пайдалану су шаруашылығы нысандарынан Қазақстанға екі ел арасындағы Келісім бойынша су бөлу кестесіне сәйкес берілетін су көлемін жыл сайын кемітіп, жеткізбей беретін көрінеді. Бүгінгі күні осы мәселені шешу өзекті болып тұр. Дегенмен аймақта істен шыққан су шаруашылығы нысандары жөнделсе, ауыл шаруашылығы мақсатындағы суармалы жерлерді толық ағын сумен қамтудың мүмкіндігі бар.– Қазақстан Республикасының агроөнеркәсіптік кешенін дамытудың 2017-2021 жылдарға арналған» мемлекеттік бағдарламасы аясында 49,0 млн текше метрді құрайтын, мемлекеттік жер актілері алынған, техникалық-экономикалық негіздемелері дайын, жобалық-сметалық құжаттары әзірленіп жатқан үш жаңа су қоймаларын салу жоспарланған. Олар, Қордай ауданындағы Ырғайты өзенінде «Ырғайты» су қоймасы (19,0 млн м3,) және Қалғұтты өзенінде «Қалғұтты» су қоймасы (15,0 млн м3), Байзақ ауданындағы Талас өзенінде «Ақмола» су қоймасы (15,0 млн м3). Жалпы құны 6 млрд теңге болатын 3 жаңа су қоймалар салынса, пайдаланудағы 34,5 мың гектар суармалы жерді сумен толықтай қамтамасыз етуге мүмкіндік болады, – деді Ерлан Кулкеев.Отырыс соңында жиынға қатысушылар Қазақстан Республикасының Ауыл шаруашылығы министрлігі мен оған тиісті комитетке бірқатар ұсыныстарын ұсынды.
Абылайхан ЖҰМАШ