Естай атындағы қалалық мәдениет сарайында Nur Otan партиясы Павлодар қалалық филиалының кезектен тыс XXXIII конференциясы өткізілді.
Айта кету керек, санитарлық-эпидемиологиялық жағдайға байланысты конференция жаңа форматта өтті. Барлық санитарлық-эпидемиологиялық нормаларды сақтай отырып, қаланың әртүрлі алаңдарында орналасқан онлайн-форматтағы жұмысқа 106 делегат қатысты.
Конференция жұмысына Nur Otan партиясы қалалық филиалының төрағасы, қала әкімі Ержан Иманслям төрағалық етіп, делегаттарды күн тәртібіндегі мәселелермен таныстырды.
Конференция барысында делегаттар Павлодар қаласының Nur Otan партиясының сайлауалды бағдарламасын бірауыздан бекітті. Қала бойынша сайлауалды бағдарлама партия Төрағасы Н.Ә.Назарбаев және Мемлекет басшысы Қ.К. Тоқаевтың ел экономикасын дамыту, пандемия зардаптарын жұмсарту арқылы қазақстандықтардың әл-ауқатын, тыныс-тіршілігін жақсартуға бағытталған тапсырмалары, сондай-ақ қаланы дамыту бағдарламасы негізінде әзірленді. Сонымен қатар, сайлауалды бағдарламада қала тұрғындарының ұсыныстары мен жазбалары көрініс тапты.
– Павлодар қалалық мәслихатына Nur Otan партиясынан кандидаттардың құрамы 55%-тен астамға жаңартылды. Әйелдердің үлесі 10%-ке, жастардың үлесі 23%-ке ұлғайды. Партиялық тізімнің сапалық құрамы түрлі топтардың ұсынылуын ескере отырып қалыптастырылды, ашық дауыс беру және жалпы партиялық қызметтің жаңа тәсілі арқасында жаңартылды, – деді партияның Павлодар облыстық филиалы төрағасының бірінші орынбасары Илья Теренченко.
Сондай-ақ, конференция барысында кандидаттар арасында пікірталас өтті, олар өзекті мәселелерді көтеріп, денсаулық сақтау, білім беру, ТКШ, кәсіпкерлік және т.б. салалардағы сұрақтардың шешу жолдарын ұсынды.
Конференция жұмысына қатысқан партия мүшелері «Праймериз» ақпараттық жүйесі арқылы кандидаттарға дауыс берді. Қорытындысы бойынша, он үш адам Nur Otan партиясынан ҚР Парламенті Мәжілісі мен Павлодар облысы мәслихатының депутаттарын сайлау бойынша партиялық тізімге ұсынылды. Ең көп дауыс жинағандар: Анатолий Бойчин, Гүлнар Қайдарова, Аурика Дяк, Света Абдрахманова, Оспанбек Алсейітов.
Партияның қалалық филиалы төрағасының бірінші орынбасары Айгүл Маликова Павлодар қалалық мәслихаты депутаттарының партиялық тізіміне енген отыз бес үміткердің аты-жөнін айтты.
Естеріңізге сала кетейік, Павлодар облыстық ХХХ кезектен тыс конференциясы ағымдағы жылдың 17 қарашасында өтеді.
