Жыл сайын жағажайға қатысты мәселе көтеріліп жүр. Бұған дейін қала әкімі қызметін атқарған Ғанибек Қазантаевтың тұсында тегін жағажай ашу бастамасы қолға алынғанын ел ұмытқан жоқ. Сол кезде бұл көпшілік тарапынан қызу қолдау да тапқан болатын. Алайда ескі әкімнің бастамасы құрғақ уәде күйінде қалып, оны түпкілікті жүзеге асыру кезекті әкім Асылбек Шәменовке жүктелгендей болды. Бірақ тегін әрі қауіпсіз жағажай ашуға кезекті әкімнің де шамасы келмеді. Осыдан кейін «Бұл жоба қолдан қолға өте бере ме?» деген күмәнді ой көптің санасын тұмшалады.
Бүгінде халықтың көкейінде коммуналды жағажай ашу жұмысын жыл басында ғана қызметіне кіріскен Қызылорда қаласының әкімі Серік Қожаниязов жандандырса деген үміт ұшқыны пайда болды. Бірақ шомылу науқаны жақындаған сайын жобаны жүзеге асыру жайы сөз болмай тұр.
Негізінен, Қызылорда жағажайсыз қала емес. Қазір өңірде екі жағажай жұмыс істейді. Нақты айтқанда, қала орталығындағы «Сыр самалы» қалалық жағажайы мен Белкөл кентіндегі кәсіпкердің ықпалымен ашылған ақылы жағажай жамағаттың жаз мезгілінде демалатын орны саналады. Бұдан өзге түрлі жағдайдағы 12 демалыс орны жұмыс істейді екен. Бірақ мұның қай-қайсысы да ақылы негізде қызмет көрсететін болғандықтан, көпшіліктің қалтасына қолайлы емес. Сондықтан халық тегін жағажай қызметін күтумен күндерін өткізіп келеді.
«Коммуналды жағажайдың жырға айналғанына да 3-4 жылдан асты. Әрбір шомылу науқанында тегін жағажайды күтетін халықтың үміті күннен күнге өшіп барады. Ал ақылы негіздегі демалыс орындарына баруға қара халықтың қалтасы көтере бермейтіні белгілі. Шынын айтқанда, қала аумағындағы екі жағажайдың өзі халықтың қажеттілігін толықтай өтеп тұр деп айтуға да келмейтін шығар. Себебі халық арасында қос бірдей шомылу орнына қатысты сирек те болса сын айтылып қалады. Сондықтан да ел игілігі үшін жайлы да, тегін жағажай жұмысын жолға қойса екен дейміз. Ақылы негіздегі демалыс орындарына бәрінің қалтасы көтере бермейтінін ескерген жөн», – деп ойын білдірді қала тұрғыны Бекзат Қайратов.
Негізінен, Қызылорда қаласынан тегін, әрі қауіпсіз жағажай ашу бастамасы 2021 жылы қолға алынған болатын. Сол уақытта жазғы демалыс орны Эдельвейс саяжайы аумағында болады деп жоспарланды. Тіпті, арнайы орында белгіленген еді. Бірақ сол жылы жол салушылар аталмыш аумақтың су беретін арнасын көміп тастап, су айналымы болмай, жағажай ашуға жарамсыз деп танылғаны айтылды. Бертін келе бұл аумаққа шлюз қойылып, бекітілген каналдар қайта ашылғаны жария болды. Соның негізінде көп ұзамай халықты тегін шомылу орнын ашу жұмысы қайта жанданатынына сендірді. Алайда жоба тағы да құрғақ уәде күйінде қалып қойды.
«Облыс орталығынан жайлы коммуналдық жағажай ашу қажеттігі әлі де өзектілігін жойған жоқ. Әсіресе, қымбатшылық қыспаққа алған қазіргі қоғамда тегін демалыс орнына деген сұраныс жоғары. Халықтың бәріне бірдей ақылы жағажайда демалу қолжетімді емес. Осыдан 3-4 жыл бұрын тегін жағажай ашу бастамасы көпшілікті қуанышқа бөлеген болатын. Бірақ түрлі себеппен кейінге шегеріліп, сиырқұйымшақтанып кетті. Содан бермен қарай бұл мәселені шешуге ниет білдірген бірнеше әкім қызметін ауыстырып та үлгерді. Елдің ендігі үміті қаланың бүгінгі әкімінде болып тұр. Жаңа әкім жаңашыл талабын қоя отырып, жағажай ашу ісін жедел жүзеге асырады деген үміт бар», – деп ойын жеткізді тағы бір қала тұрғыны Сапарбек Ерімбет.
Халықтың пікіріне сәйкес, жағажай ашу жұмысы әлі жанданады деген сенім зор. Яғни, жаңа әкім жалпыға бірдей жағажай жұмысын жүзеге асырады деп үмітпен қарайды.
Осы орайда елдің талап-тілегін ортаға салып, Қызылорда қаласы әкімдігінен жағажай жұмысының бүгінгі жай-күйін сұрап көрдік.
«Бұған дейін қала аумағында суға түсуге қолайлы жерлер зерделеніп, «Эдельвейс» саяжайының тұсында орналасқан ШЖҚ «Су жүйесі» МКК-на тиесілі учаскеде жазғы демалыс орнының жұмысын үйлестіру көзделген. Нақты айтқанда, саяжайда орналасқан көлшіктен жағажай ашу мақсатында кәсіпкер «Sanline ВОЛС» ЖШС-ның директоры Қолқанат Ертарғын Нұрланұлы (қосалқы жалға алушы) мен «Қызылорда Су жүйесі» (жалға беруші, 21.08.2023 ж №04-2501) мекемесімен келісімшарт жасалынды. Қазір кәсіпкер тарапынан қажетті жабдықтар, әртүрлі құрал алынып, алдағы 10-15 күн уақыт көлемінде коммуналдық жағажайды ашу жоспарлануда. Коммуналдық жағажайдың ашылуы бойынша жұмыс барысы қала әкімдігінің бақылауында», – деп мәлімдеді бұл жайында Қызылорда қаласы әкімдігінің баспасөз қызметі.
Қалай дегенде де аптапты ыстықта жанға сая іздеген жергілікті жұртшылық тегін жағажайдың ашылуын тағатсыздана күтіп жүр. Ал қала әкімдігінің уәжіне сүйенсек, халық коммуналды жағажайдың игілігін жақын арада көретініне сендіріп отыр. Әйтеуір уәде сөз күйінде қалмай, елдің үміті ақталса игі.
Ербақыт ЖАЛҒАСБАЙ,
Қызылорда облысы