Павлодар қаласында Көші-қон полициясының қызметкері сотталды, – деп хабарлайды Aikyn.kz.
Павлодар қаласының №2 соты көші-қон полициясының қызметкері К.-ға қатысты пара берушінің пайдасына заңсыз әрекеттер жасағаны үшін пара алу фактісі бойынша (ҚК-нің 366-бабы 2-бөлігі) қылмыстық істі қарады.
"К. 2022 жылдың 31 тамызы мен 2023 жылдың 23 сәуірі аралығында шетел азаматы Э.-ден көші-қон заңнамасына сәйкес әкімшілік жауапкершілікке тартпағаны әрі Қазақстанда уақытша тұруға рұқсат бергені үшін жалпы сомасы 100 000 теңгені пара ретінде алған. Сотталушының кінәсі куәлардың айғақтарымен, құжаттық дәлелдемелермен және сараптамалық қорытындылармен дәлелденді", – деп жазды Павлодар облыстық соты.
Пара алғаны үшін (ҚК-нің 366-бабы 2-бөлігі) заң бойынша негізгі жаза ретінде айыппұл немесе 3 жылдан 7 жылға дейін бас бостандығынан айыру жазасы көзделген. Қылмыс жасау ұзақмерзімді, жүйелі түрде болғанын, істің мән-жайын әрі К.-ның жеке басын ескере отырып, сот оған неғұрлым жеңіл жаза, яғни айыппұлды тағайындауға негіз көрмеді.
«Сонымен қатар сот кінәсін толық мойындауын, шын жүректен өкінуін, қылмыстық құқықбұзушылықты ашуға белсене көмектесуін және оның жасын ескере отырып, К.-ға төмен мерзім – 3 жылға бас бостандығынан айыру жазасын тағайындады. Сондай-ақ К. «полиция аға лейтенанты» арнаулы атағынан әрі өмір бойына мемлекеттік қызметте лауазымдарды атқару құқығынан айырылды. Үкім заңды күшіне енген жоқ», – делінген ақпаратта.