Бүгінге дейінгі медальдық көрсеткіштерде де үлкен айырмашылықпен көш бастап келеді. Жарыстың үшінші және төртінші күні спортшылар көкпар, көкбөрі, аударыспақ, жамбы ату, кураш, дәстүрлі садақ ату, қазақ күресі, мас-рестлинг, асық және тоғызқұмалақ, теңге ілу, құсбегілік, арқан тарту ойындары бойынша сайысқа түсті.
Әзірге ұлттық құраманың еншісінде – 48 медаль. Оның 28-і – алтын. V Дүниежүзілік көшпенділер ойындарының үшінші күнінде аударыспақ сайысының үш салмақ категориясы бойынша жеңімпаздары анықталды. 90, 100 және 100 келіден жоғары салмақ дәрежесіндегі спортшылар бәсекесі өтті. Бұл «Қазанат» ипподромы маңындағы этноауылда ұйымдастырылды. Аударыспақтан 100 келіден жоғары салмақта Біржан Қосалиев Қырғызстан спортшысы Кумушбек Қыдырәлиевтен басып түсіп, алтын жүлдеге қол жеткізді. Сырым Ізбасаров (100 келі) моңғолиялық спортшы Ерболат Жеңісбекті жеңіп, алтын жүлде алды. Ал 90 келі салмақ дәрежесінде Есімхан Рахматіллә күміс жүлде еншіледі. Ол Қырғызстан спортшысы Ислам Бердібекуулынан жеңілді. Ұлттық құрама спортшылары аударыспақтан жалпы есепте бес алтын, бір күміс еншіледі.
Көшпенділер ойынының үшінші күнінде «Арғымақ» ат-спорт кешенінде өткен Qalqan стиліндегі дәстүрлі садақ ату сайысында ерлер арасындағы алтын жүлде Мажарстан спортшысы Кочжа Ласзлоға бұйырды. Екінші және үшінші жүлделі орындарды қазақстандық Ербол Тапенов пен Қанат Қасымхан иеленді. Бұл – Қасымханның көшпенділер ойындарындағы екінші қола медалі.
Ал әйелдер арасындағы мергендер ішінен үздік шыққан индонезиялық Рено Сури алтын медаль иегері атанса, Ресей спортшысы Анна Алексеева күміс жүлдені иеленді. Ал Қырғызстаннан келген спортшы Асель Садырова қолаға қол жеткізді.
Қазақ күресінен өткен бәсекелер Жақсылық Үшкемпіров атындағы Жекпе-жек сарайында ұйымдастырылды. Бұл спорт түріне ерлер мен әйелдер әрқайсысы төрт салмақ дәрежесінде сынға түсті. Қазақстандық балуандар екінші жарыс күні 4 алтын, 1 күміс, 2 қола жүлде иеленді. Айта кетсек, жарыстың бірінші күні боз кілемде күрескен 8 қазақстандық спортшының барлығы да жеңістің биік тұғырына көтерілген болатын. Ерлер және әйелдер арасындағы қазақ күресі аталған жекпе-жек сарайында өз мәресіне жетті. 41 елдің спортшылары 8 салмақ дәрежесінде бәсекеге түсті. Жарыс нәтижесі бойынша ерлер арасында Ерасыл Жаңатай (90 келі) қола медаль, Ерсұлтан Мұзаппаров (100 келі) мен Нұрдәулет Жарылғапов (100 келіден жоғары) алтын медаль тақты. Ал әйелдер арасында қазақ күресінен Роза Нысантайқызы (70 келі) мен Зарина Сарипова (65 келі) бірінші орыннан көрінсе, Зәмзәгүл Файзоланова (77 келі) күміс медальды мойнына ілді. Альбина Бақиева қоланы қанағат тұтты. Қазақстандық балуандар қазақ күресінен барлығы 15 медаль алды: оның ішінде 12 алтын, 1 күміс, 2 қола.
«Алау» мұз сарайы аренасында кураштан ерлер және әйелдер арасындағы бәсеке аяқталды. Ұлттық құрама бұған дейін өзбек күресін 13 жүлдемен (1 алтын, 6 күміс 6 қола) қорытындылады. Бәсекенің соңғы күні әйелдер бір салмақ, ал ерлер үш салмақ дәрежесі бойынша жеңіс тұғырына таласты. Ерлер арасындағы таласқа түскен алтын медаль Өзбекстаннан келген Отабек Касановқа бұйырды. Отандық спортшы Айбек Қазақбаев (66 келі), Ернұр Сүлейменов (60 келі) және Шаймерден Нұрдин (74 келі) күміс медальға ие болды. Ал әйелдер арасында 57 келі салмақ дәрежесінде қазақстандық Толғанай Әбенова екінші орын тұғырынан, Алтынай Нұрханова үшінші орыннан көрінді.
10 қыркүйек күні Саха халқының ұлттық спорты – мас-рестлинг (таяқ тарту) бойынша бәсеке өз мәресіне жетті. Жүлделі орындар ерлер мен әйелдер арасында 2 салмақ дәрежесі бойынша сарапқа салынды. Мас-рестлингтен ерлер арасында 105 келі салмақ дәрежесінде Еркебұлан Ерлан мен 75 келі салмақ дәрежесінде Ольга Душаева қола жүлдегер атанды.
«Қазанат» ипподромында өтіп жатқан көкпардан іріктеу кезеңінде Қазақстан командасы АҚШ ковбойларын 12:4 есебімен жеңсе, Қырғызстан спортшылары Түркиялық әріптестерін 15:1 есебімен басып озды.
Көкбөрі сайысына келер болсақ, Түркия командасы АҚШ ойыншыларын 2:1 есебімен ұтты, ал ресейлік шабандоздар Өзбекстан командасынан 3:2 есебімен басым түсті.
10 қыркүйек күні өткен тоғызқұмалақ сайыстарының нәтижесі бойынша 23,5 ұпаймен Қазақстан командасы көш бастаған. Кешегі жарыс қорытындысы бойынша Мөлдір Серікқызы, Бексұлтан Бостандықов тоғызқұмалақтан көшпенділер ойындарының чемпионы атанса, Аңсаған Қожанәсіп пен Ерсұлтан Әуелбай жарыстың қола жүлдегерлері атанды.
Көшпенділер ойындары бағдарламасында қызық әрі аса қырағылықты талап ететін ойынның бірі – жамбы ату. «Қазанат» ипподромы маңындағы этноауылда өткен жамбы ату спортының Түркі стилінен алтын жүлдені Ералхан Айкөз, ал қола жүлдені Айтбек Сарыбай жеңіп алды. Күміс жүлдені түркиялық Керем Игит еншіледі. Жарыстың екінші күнінде ұлттық құраманың үш бірдей спортшысы Азия стилінен жүлделі орындарға ие болған еді. Ел намысын қорғап, бәсекеге түскен спортшылардың қоржынға салған жалпы медаль саны әзірге 54-ке жетті, оның 24-і – алтын, 12-сі – күміс, 18-і – қола.
V Дүниежүзілік көшпенділер ойындарына қатысушылар 21 спорт түрінен 97 медаль жиынтығын сарапқа салып жатыр. Жарыстың жалпы жүлде қоры – 250 млн теңге. Төрткүл дүние көз тіккен дүбірлі доданың жабылу салтанаты «Көшпенділер ғаламы» этноауылында 13 қыркүйекте өтеді.
Бет қатталып жатқанда: Бес асықтан Қазақстан қыздар құрамасы және асық атудан ерлер құрамасы V Дүниежүзілік көшпенділер ойындарының жеңімпазы атанды.
Арқан тарту бойынша Қазақстан Ресейден кейін екінші орынға тұрақтады.
Сымбат БАУЫРЖАНҚЫЗЫ