Ақтауда әзілдеп жедел жәрдем шақырған тұрғын 80 000 теңге айыппұл арқалады, – деп хабарлайды Aikyn.kz lada.kz-ке сілтеме жасап.
Бұл туралы Маңғыстау облыcтық жедел және шұғыл медициналық жәрдем стансасының баспасөз қызметі мәлімдеді.
Оқиға 14 қазан күні болған. Ақтаулық тұрғын 103-ке қоңырау шалып, көп мөлшерде дәрі-дәрмек ішкенін айтқан.
"Жедел жәрдем бригадасы оқиға орнына жеткенде тұрғын "пранк" жасап, телефон соққанын айтты", – делінген хабарламада.
Осыған байланысты ҚР Әкімшілік құқықбұзушылық туралы кодексінің 438-бабына сәйкес қоңырау жалған деп тіркелді. Арнайы қызметке көрінеу жалған қоңырау шалғаны үшін тұрғынға 80 мың теңге айыппұл салынды.