Үкімет басшысы Асқар Мамин Армения астанасы Ереванда өткен Еуразиялық үкіметаралық кеңес отырысына қатысты. Жиынға Ресей премьері Д.Медведев, Беларусь премьері С.Румас, Армения премьері Н.Пашинян, Қырғызстан премьері М.Абылғазиев және Еуразиялық экономикалық комиссия алқасының төрағасы Т.Саркисян да қатысты.
Отырыс күн тәртібіне одаққа мүше мемлекеттер арасындағы сауда-экономикалық ынтымақтастық, өзара сауда-саттықты кеңейту, ЕАЭО ішкі нарығы аясындағы кедергілерді жою және өзге де 13 мәселе шығарылды. Шағын құрамда үкімет басшылары одақты дамытудың бірқатар тұжырымдамалық мәселелері жөнінде пікір алмасты. Цифрлық трансформациялау аясында трансшекаралық өзара іс-қимылды тереңдету, одақтастар арасындағы тауарайналым көлемін ұлғайту, кедендік әкімшілендіруді жетілдіру тетіктері талқыланды.Ал кеңейтілген келіссөздер «бірыңғай терезе» қағидаты бойынша сыртқы экономикалық қызметті реттеуді жетілдіру мәселелеріне, ЕАЭО саудасының цифрлық экожүйесін дамытуға жағдай жасау, өнеркәсіптік кооперацияны және технологиялар трансферін дамыту, экономиканың жекелеген салаларында интеграциялық әлеуетті одан ары арттыру мәселелеріне арналды.
Қазақстан Премьер-министрі А.Мамин әлемдік экономиканың құбылып тұрған шағында дамудың оң қарқынын сақтау үшін барлық күш-жігер салу қажеттігіне назар аудартты. Бүгінде одаққа мүше барлық елдермен өзара саудадағы кедергілерді жою үшін белсенді бірлескен жұмыстар жүргізіліп жатыр. Тәжірибе көрсеткендей, жаңа кедергілер де туындауда, бұл өз кезегінде бұдан да тығыз экономикалық қатынастарды дамыту керегін көрсетеді.
– Біз қарқынымызды төмендетпеуіміз керек. Қазіргі кедергілерді жою өзара сауда көлемін ұлғайтып, елдер арасындағы экономикалық байланыстарды кеңейтуге мүмкіндік береді, – деді Асқар Мамин.
Қазақстандық тарап ЕАЭО аясында сәйкестендіру құралдары арқылы тауарларды таңбалау бойынша интеграциялық ынтымақтастық мәселелерін реттеуді жетілдіру қажеттігіне, транзиттік тасымалдарды қадағалау жүйесін енгізуге, кедендік әкімшілендіруді күшейтуге, цифрлық сауданы дамытуға, одақтың деректер транзиті саласындағы транзиттік әлеуетін арттыруға мән берді.
– Өзара пайда, ымыраға келу және барлық тараптардың мүдделерін ескеретін тиімді шешімдер шығару қағидаттарының негізінде өзара қарым-қатынастарымызды қалыптастыру Еуразиялық одақты одан ары нығайтуға септесетін болады. 2025 жылға дейін еуразиялық экономикалық интеграцияны дамытуда біз үшін басты шарт – экономикалық құрауышының болуы, – деді А.Мамин.
Отырыс қорытындысы бойынша «Еуразиялық өнеркәсіптік кооперация, субконтрактация және технологиялар трансфері желісі» жобасын іске асыру туралы; одақтың ішкі нарығының жұмысы аясында кедергілерді жою бойынша жұмыстар барысы туралы; ЕАЭО-да цифрлық сауда экожүйесін дамыту үшін жағдайлар жасау туралы; сыртқы экономикалық қызметті реттеу жүйесінде «бірыңғай терезе» ұлттық тетігінің эталондық үлгісін сипаттау туралы; тауарларды әкелу мен шығаруда шыққан елін анықтауда бірыңғай тәсілдерді бекіту туралы бірқатар құжаттарға қол қойылды.
Еуразиялық үкіметаралық кеңестің келесі отырысы биыл 9 тамызда Қырғызстанның Шолпан ата қаласында өтпек.
Елдос СЕНБАЙ