«Ауыл» партиясы сайлау қарсаңындағы үгіт-насихат науқанына дайын. Бұл туралы партия төрағасы Әли Бектаев баспасөз мәслихатында мәлімдеді. Оның айтуынша, республикалық және аймақтық штабтар жұмысы ширай түскен. Арнайы семинар-тренингтер ұйымдастырылып, штаб мүшелері үгіт-насихат жұмыстарын жүргізудің ереже-талаптарымен танысқан. Заңгерлер партия мүшелеріне «Сайлау туралы заңның» баптарын түсіндірді.
Үгіт-насихат жұмыстарына қажетті плакаттар мен үнпарақтар, партияның бағдарламасы қажетті мөлшерде басылды. Республикалық қоғамдық штабтан бөлек, 17 өңірде 17 өңірлік штаб құрылған.
Төлеутай Рахымбековтың Республикалық сайлауалды штабына белгілі партия мүшелері, қоғам қайраткерлері, жазушылар және ауылшаруашылығы ғылымының өкілдері кіріп отыр. Елордада өткен жиынға Көпмағанбет Елемесов, Намазалы Омашұлы, Ақжол Мейірбеков, Дәулеткерей Кәпұлы сынды ғылым және өнер саласының қайраткерлері қатысты. Қоғамдық штабтың ресми ашылуында үгіт кезеңіндегі жоспарлар пысықталып, үгіт-насихат жұмыстарының басым бағыттары айқындалды.
Т.Рахымбековтың сайлауалды штабтары барлық облыста құрылды. Соның аясында мобильді үгіт топтары жұмыс істейді. Ондағы белсенділер жаңа кандидаттың саяси науқан алдындағы бағдарламасын насихаттауға бағытталған іс-шараларға белсенді қатыспақ. Бұған қоса, әлеуметтік желілер кеңінен қолданылады. Өйткені сол арқылы түрлі ұсыныс-тілектерді жедел қабылдап, уақытылы жауап қатпақ.
Төлеутай Рахымбековтың сайлауалды бағдарламасындағы ең негізгі мәселе – ғылым мен өндірістің, оқу жүйесі мен өндірістің тікелей байланыста болуы. Теориямен шектелмей, алған білімді өндіріске енгізу. Бағдарлама ауыл шаруашылығын дамытумен бірге, төрт бөлімнен тұратын тұғырнамада ұлттық дәстүрлерді жаңғырту, отбасы құндылықтарын сақтау және жастар саясатын жүйелеу сияқты бағыттар да қамтылған.
Айдана БЕГІМ