«Ауыл» партиясының кандидаты Төлеутай Рақымбеков үгіт-насихат жұмыстарымен Атырау өңіріндегі бірқатар кәсіпорындарды аралады. «Сарайшық» кәсіпорнында ұсақ малдан 14 түрлі өнім шығарады, бұл – еліміздегі ғана емес, бүкіл ТМД көлеміндегі бірегей аграрлық ферма.
Президентікке үміткер Төлеутай Рақымбеков оның жай-жапсарымен танысып, мемлекеттік бағдарламаларды тиімді қолданудың тетіктерін түсіндірді. «Төлеутай Сатайұлымен кездестік, сөйлестік, сауалдарымызды қойдық. Болашақта ауыл шаруашылығын дамыту үшін 40-50 қожалықты біріктіріп, соның ішінде бір қожалықты негізгі шаруашылық ретінде белгілеу керек деді. Сол қожалыққа үкіметтен ақша бөлініп, шаруашылықтарды дамытуға күш салынады. Бұл ауылдық жерлерді дамытудың бір парасы ғана деп ойлаймын», – деді шаруа қожалық басшысы.
Атырау облысында алма бағы шаруашылығы бас-аяғы 160 гектар аумаққа 40 мың түп ағаш отырғызған.
«Аймақтың құрғақ және қатаң климатын ескерсек, бұл – өте батыл бастама. Енді осы тәжірибені кеңінен қолданып, саланың дамуына тың серпін беруге болады», – дейді үміткер.
Атыраудағы Дамбы балық инспекциясында ғылыми балық аулау процесімен танысып, балықшылармен жүздескен кандидат халықты сапалы азық-түлікпен қамтамасыз етіп отырған ауыл шаруашылығы мамандарының жағдайын жақсартудың өзектілігіне тоқталды.
«Өңірдегі балықшылардың еңбекақысын өсіру керек. Балық шаруашылығын тиісті бағытқа қойып дамытқан жағдайда, яғни кәсіп түрі ретінде субсидия бөлініп дамытсақ, кәсіпкерлер үшін қосымша салық алынып тасталса, балықшылардың әлеуметтік ахуалы ретке келтірілсе, онда бұл сала ел экономикасына көл-көсір пайда әкелетіні сөзсіз», – деді ол.
Айдана БЕГІМ