ЕҚЫҰ байқаушыларының миссиясы Қазақстандағы президенттік сайлауды табысты өтті деп бағалады. Бұл туралы сыртқы саясат ведомствосы хабарлады.
Сыртқы істер министрі Бейбіт Атамқұлов Еуропадағы қауіпсіздік және ынтымақтастық ұйымының Демократиялық институттар және адам құқықтары жөніндегі бюросының (ЕҚЫҰ/ДИАҚБ) директоры Ингибьёрг Гисладоттирмен, ЕҚЫҰ Парламенттік ассамблеясының байқаушылар миссиясының басшысы – ЕҚЫҰ ПА Демократия, адам құқықтары және гуманитарлық мәселелер жөніндегі комитетінің төрайымы Маргарет Кинер-Нелленмен және ЕҚЫҰ/ДИАҚБ бақылаушылар миссиясының басшысы Уршула Гацекпен кездесу өткізді.
Келіссөздердің басты тақырыбы Қазақстан президентінің кезектен тыс сайлауын байқау жөніндегі ЕҚЫҰ миссиясының жұмысы болды. Кездесу достық пейілде және конструктивті ауанда өтті.
Министр тарихи өлшем бойынша аз уақыт ішінде еліміз көптеген жетістікке қол жеткізгеніне назар аудартты. Экономика нығайып, халықтың табысы өсті. Қоғамымыз тұрақтылық пен төзімділік үлгісі ретінде қарастырылады. Республика саяси дамуының жаңа кезеңіне шықты. Азаматтардың өз ықтиярын білдіру үдерісі заңнамаға және қабылданған халықаралық міндеттемелерге толық сәйкес адал, ашық және әділ өтті.
Өз кезегінде ЕҚЫҰ/ДИАҚБ басшысы кезектен тыс президенттік сайлаудың табысты өтуімен құттықтап, миссия жұмысы үшін барынша қолайлы жағдай жасалғанына алғыс білдірді. ДИАҚБ басшысының пікірінше, Қазақстандағы сайлау алдындағы науқан іс жүзінде салмақты бұзушылықсыз жүрді. Сонымен қатар ол қазақстандық билік өкілдерінің байқаушылар баяндамасын конструктивті қабылдағанын және жүйені одан ары жетілдіру туралы жоспарларын атап өтті.
«Кейбір үкіметтер осындай есептерді қабылдаудан үзілді-кесілді бас тартады. Исландияда мысалы, «Дос әрқашан саған шындықты айтады, ал жау бәрі жақсы дейді деген мақал бар», – деді ДИАҚБ директоры.
Осы орайда Бейбіт Атамқұлов қазақ тілінде «Дос жылатып айтады, дұшпан күлдіріп айтады» деген мақал бар екенін жеткізді. Ол ел Үкіметі сайлау қорытындысы бойынша еуропалық байқаушылардың мәлімдемесінде көрсетілген ескертулер мен ұсыныстарды назарға алатынын жеткізді.
«Біз жаңадан сайланған Президентті сайлаудағы жеңісімен құттықтаймыз. Ең бастысы, сіздің Үкіметпен арамызда диалог бар», – деді ЕҚЫҰ ПА бақылаушылар миссиясының басшысы М.Кинер-Неллен. Оның айтуынша, бақылаушылардың жергілікті билікпен өзара іс-қимылы өте байыпты болды, сондықтан ол жемісті ынтымақтастықтың ары қарай жалғасатынына үміт білдірді.
СІМ дерегінше, сайлауды бақылауға 900-ден астам халықаралық байқаушы қатысты. Атап айтқанда, 9 халықаралық ұйымнан 866 байқаушы келді. Бұл ретте әлемнің 40-тан астам елінен 227 шетелдік тілші мен журналист аккредиттелді, бұл – Қазақстандағы сайлау өткізу тарихында бұрын-соңды болмаған рекордтық көрсеткіш. Демек, шетелдік журналистердің, халықаралық қоғамдастықтың республикамыздағы президенттік додаға деген қызығушылығы зор болған.