Қасым-Жомарт Тоқаев Ақордада және облыстардың Нұр-Сұлтан, Алматы, Шымкент қалаларының әкімдерімен кеңес өткізді. Өңірлерді дамытудың өзекті мәселелерін жедел шешу жөнінде нақты міндет жүктеді. Бұл туралы Президенттің баспасөз қызметі хабарлады.
– Ел экономикасын дамытудың негізгі міндеті – халықтың тұрмыс сапасын жақсарту және ішкі тұрақтылықты сақтау. Сондықтан бәріміз мемлекет мүддесі жолында еңбек етуге тиіспіз, – деді Мемлекет басшысы.
Қазақстан Президенті биылғы жыл қоғамдық-саяси оқиғаларға толы болатынын атап өтті. Оның пікірінше, мерейтойларға арналған іс-шараның барлығы іскерлік және атаулы сипат алуы тиіс.
Қасым-Жомарт Тоқаев Волонтер жылын сапалы өткізудің маңызына назар аударып, әкімдерге мұның министрліктің немесе Үкімет деңгейінде өткізілетін кезекті бір акция емес, еліміздің барлық аймағындағы азаматтардың басым бөлігін қамтитын жүйелі жұмыс екенін ескертті.
Қасым-Жомарт Тоқаев әкімдерге тұрғындардың қауіпсіздігін сақтау, оқыс оқиғалардың алдын алу үшін тиісті шаралар қабылдауды тапсырып, төтенше жағдайлардан сақтанудың маңызын атап өтті.
Сөзінің соңында өңірлерді дамыту және әлеуметтік мәселелерді шешу әкімдерге жүктелген маңызды міндет екенін айтты. Кеңестен кейін Мемлекет басшысы Солтүстік Қазақстан облысының әкімі Құмар Ақсақаловты, Алматы қаласының әкімі Бақытжан Сағынтаевты, Ақтөбе облысының әкімі Оңдасын Оразалинді, Алматы облысының әкімі Амандық Баталовты, Түркістан облысының әкімі Өмірзақ Шөкеевті, Павлодар облысының әкімі Әбілқайыр Сқақовты және Шымкент қаласының әкімі Мұрат Әйтеновті қабылдады.
Мемлекет басшысы әр әкімге өз өңірлері бойынша бірқатар нақты тапсырма берді.
