Қазақстан визасыз елдер тізімін 80 мемлекетке дейін арттырды. Бұл туралы Сыртқы істер министрлігінің ресми өкілі Айбек Смадияров айтты.
«2022 жылы визасыз елдердің тізімі паспорттардың әртүрлі санаттары бойынша 80 мемлекетке дейін кеңейтілді. Оның ішінде жалпы азаматтық паспорттар үшін – 26 мемлекет. Паспорттардың әртүрлі санаттары бойынша 9 жаңа елмен өзара келісім жасалды: Мальдив аралдары, Андорра, Никарагуа, Венесуэла, Боливия, Парагвай, Доминикана, Албания және Белиз», – деді ол.
Мұнан бөлек, биыл 12 қазанда Қатармен дипломатиялық және арнайы паспорттардың иелері үшін визалардан өзара босату туралы үкіметаралық келісімге өзгерістер енгізу туралы хаттамаға қол қойылды. Ол жалпы азаматтық паспорттардың иелерін визалық талаптардан босатады.
«Қолайлы инвестициялық ахуалды құру, іскерлік байланыстарды жандандыру және елдің туристік әлеуетін арттыру үшін Қазақстан Үкіметі Иран Ислам Республикасының, Қытай Халық Республикасының және Үндістан Республикасының азаматтары үшін визасыз режим енгізді. Бұл осы елдердің азаматтарына Қазақстан аумағында 14 күнге дейін болуға мүмкіндік береді», – деді Айбек Смадияров.
Бұдан бөлек, биыл елімізде құны 3,7 млрд доллар болатын 36 инвестициялық жоба шетелдіктердің қатысуымен іске асырылған. Ал тәуелсіздік жылдары Қазақстан шамамен 400 млрд доллар инвестиция тартқаны мәлім болды.
«Осы жылдың басынан бері шетелдіктердің қатысуымен жалпы сомасы 3,7 млрд доллар болатын 36 инвестициялық жоба пайдалануға берілді. 3,8 мыңнан астам жұмыс орны құрылды. Бұл ретте осы жылдың соңына дейін кемінде 5 жоба пайдалануға беріледі деп күтіледі. Экономиканың түрлі салаларында ұсынылған инвестициялық жобалардың жалпыұлттық пулымен жан-жақты жұмыс жүргізіліп жатыр. Бүгінде пул әлемнің 30-дан астам елінен жалпы сомасы 32,1 трлн теңгеге инвестиция тартатын 932 жобадан тұрады және шамамен 130 мың жұмыс орнын құруды көздейді», – деді А.Смадияров.
