Мүгедектігі бар қазақстандықтарды әлеуметтендіру және жұмысқа орналастыру жобасын жүзеге асыруға 20 миллион теңге бөлінеді. Бұл туралы Мәдениет және ақпарат министрлігінің баспасөз қызметі мәлім етті, - деп хабарлайды Aikyn.kz.
ҚР МАМ тапсырысы бойынша «Қазақстанда мүгедек адамдарды азаматтық қоғам күштерімен әлеуметтендіру және жұмысқа орналастыру шараларын іске асыру» жобасы басталды. Бастама мүгедектігі бар адамдардың өмір сүру сапасын арттыруға бағытталған. Жобаны «Қорған-М» қоғамдық бірлестігі пилоттық негізде үш өңірде Түркістан, Қарағанды облыстарында және Шымкент қаласында іске асырады.
Жергілікті ҮЕҰ-ның көмегімен әлеуметтік және еңбек салаларымен біріктірілген іс-шаралар кешені ұйымдастырылады. Жоба аясында 15 шілдеде ҮЕҰ мен бастамашыл топтарға арналған шағын гранттар конкурсына қатысуға өтінімдер қабылдау басталды.
Ең алдымен, мүгедектектігі бар адамдарды әлеуметтендіруге және жұмысқа орналастыруға, сонымен қатар оларды қоғамдық өмірге тартуға бағытталған жобалардың қаржыландыруды ұтып алу мүмкіндігі бар.
«Өтініш берушілер жобалық өтінімді дайындау кезінде басшылыққа алатын негізгі бағыттар: мүгедектерді кәсіпкерлік қызмет бойынша оқыту, менторлық және бизнес-коучинг, кедергісіз орта құру, цифрлық сауаттылықты арттыру», - деп атап өтті Азаматтық бастамаларды қолдау орталығының төрағасы Лима Диас.
Биыл конкурс аясында 20 шағын грант беру жоспарланып отыр. Атап айтсақ, Түркістан облысына – 10, Қарағанды облысына және Шымкент қаласына 5 гранттан бөлінеді. Орташа есеппен, жобаларды іске асыру мерзімі екі айдан төрт айға дейін созылады.
Конкурсқа қатысу үшін telegram-ботында ережені жүктеп, толығырақ танысуға болады.
Сараптама, зерттеу мақала, күнделікті өзекті ақпаратты «Айқынның» Telegram арнасынан таба аласыз.