Шымкенттік полицей өз анасына қол көтерген. Оқиға отбасындағы жанжал кезінде болған, – деп хабарлайды Аikyn.kz сайты Zakon.kz-ке сілтеме жасап.
Оқиға биыл 27 сәуірде кешкі сағат 20:50 шамасында орын алған. Полиция подполковнигі анасына қол көтеріп, денсаулығына аздап зиян келтірген. Сот отырысында полицейдің анасы ұлы қол көтергенін растады. Ал тәртіп сақшысы ашу үстінде анасын ұрғанын мойындап, кешірім сұраған.
4 шілдедегі сот шешімімен полиция қызметкері Әкімшілік құқық бұзушылық туралы кодекстің 73-1-бабының 1-1-бөлігімен кінәлі деп танылды. Оған әкімшілік жаза ретінде ескерту берілді. Сот шешімі шыққан соң полиция подполковнигі жұмыстан босатылды.
"Аталған жайтқа қатысты іс-құжаттар жинақталып, шешім қабылдау үшін мамандандырылған ауданаралық сотына жолданған. Сонымен қатар қызметтік тексеру жүргізіліп, оның нәтижесіне сәйкес полиция қызметкері ішкі істер органдарынан шығарылды", – делінген полиция мәліметінде.
Сараптама, зерттеу мақала, күнделікті өзекті ақпаратты «Айқынның» Telegram арнасынан таба аласыз.