Алматы облыстық партия филиалында партиялық бақылау комиссиясының кезекті отырысы өтті. Жиынға облыстық партия филиалы төрағасының бірінші орынбасары Ғалиасқар Сарыбаев, Сыбайлас жемқорлықпен күрес іс-қимылы жөніндегі қоғамдық кеңестің төрағасы Серік Мұқанов, Мемлекеттік қызметтер басқармасының басшысы Жеңіс Андабеков және комиссия мүшелері мен партиялықтар қатысты.
Талқылауда Алматы облысы Жамбыл және Панфилов аумақтық партия филиалдары бойынша партиялық бақылауды ұйымдастыру және ішкі партиялық тәртіпті күшейту жұмыстары мен аумақтық партия филиалы төрағаларының есептері тыңдалды.
Алдымен Мемлекеттік қызметтер басқармасының басшысы Жеңіс Андабеков баяндама жасады. Оның айтуынша, аудан-қалалардағы экономикалық белсенді тұрғындардың ішіндегі партия мүшелерінің үлес салмағы облыста 11 пайызды құрайды. «Құтты мекен» партиялық жобасының жүзеге асырылуы бойынша облыста 38 нысан бақылауға алынған.
– Мемлекеттік органдар алдында жыл соңына дейін мемлекеттік қызметтердің электронды нысанда көрсетілуін 80%-ға жеткізу міндеті қойылды. Осыған байланысты, барлық мемлекеттік органдарда, білім беру мекемелерінде өзіне-өзі қызмет көрсету бұрыштарын құру тапсырылған болатын. Бүгінде Панфилов ауданы бойынша өзіне-өзі қызмет көрсету бұрыштарымен қамтылу деңгейі 63,07 %, Жамбыл ауданы бойынша өзіне-өзі қызмет бұрыштарымен қамтылу деңгейі 40,45% құрайды, – дейді Ж.Саятбекұлы.
Отырыс барысында Жамбыл және Панфилов аудандық партия филиалдарының төрағалары атқарылған жұмыс туралы есептерін оқыды. Баяндамашылар талқылаудан соң орын алған кемшіліктерді түзетуге уәде берді.
– Панфилов аудандық қоғамдық қабылдау бөлмесіне 2019 жылдың бірінші жартыжылдығында 127 өтініш түсті. Осы өтініштердің 25 пайызы толық шешілген, құжат рәсімдеу мен Мемлекеттік атаулы әлеуметтік көмек бойынша 32 өтінішке толық жауап қайтарылды. Қалған 70 өтінішке құқықтық кеңестер берілді, – деп түйіндеді баяндамасын Панфилов аудандық партия филиалы төрағасы Темірлан Бектасов.
Өз кезегінде партиялық бақылау комиссиясының төрағасы Ермек Келемсейіт те партиялық жұмыстарды жақсарту мақсатында бірқатар ұсыныстарды атап өтті. Соның ішінде «Құтты мекен» партиялық жобасы аясында атқарылатын жұмыстарды жандандыру, нысандарды бақылауға алу мәселесіне ерекше тоқталды. Сонымен қатар мемлекеттік бағдарламаларды жүзеге асыру үшін бөлініп жатқан қаржының тиімді әрі мақсатты түрде жұмсалуын қадағалау мақсатында аумақтық партия филиалдарының комиссия отырыстарында жауапты мекеме басшыларының есебін тоқсанына бір рет тыңдау міндеттемесін жүктеу қажет екенін айтты. Ұсыныс шеңберінде өз-өзіне қызмет көрсету бұрыштарының толық көлемде ашылуын қамтамасыз ету және тұрғындар арасында мемлекеттік қызметтерді алу тәртібі, рәсімі, мерзімдері туралы ақпараттық насихат жұмыстарын күшейту мәселелері де қамтылды.
Отырыс соңында анықтамада көрсетілген кемшіліктер назарға алынып, партиялық бақылау жұмысын күшейту тапсырылды.