Осы аптада Ресей Думасының депутаты, саясаткерсымақ Евгений Федоров деген біреу Қазақстанда сепаратизм үшін бірнеше адамның сотталғанына күйіп-пісіп, еліміздің аумақтық тұтастығына күмән келтірді. Тіпті, Қазақстан жерін «заңсыз бөлінген аймақ» деп соқты.
Әрине, мұндай жойдасыз пікірлерді жеке адамның пікіріне немесе белгілі бір күштердің екі ел арасына сына қағу әрекетіне жатқызуға болады. Алайда осындай бассыздыққа уақытында лайықты тосқауыл қойылуға тиіс.
«Ит үреді, керуен көшеді» десек те...
Бұл сәуегей Қазақстанның тәуелсіздігін мойындамайтынын байқатып, тіпті «Халықаралық құқық бойынша Қазақстан Кеңес одағының құрамынан заңды процедура негізінде, шыққан жоқ. Бұл құықтық дерек, басқа ештеңе емес. Бұл жағдай Қазақстанды заңсыз аумақ ретінде қарастыруға негіз болады» деп соқты.
Федоров сияқты «дімкәс жандарға» назар аудармауға да болар еді. Бірақ бұл мемлекетіміздің ұлттық, ақпараттық қауіпсіздігінің мәселесі екенін естен шығаруға болмайды.
«Оның емі психиатрия төсегінде»
Әдетте, олардың арандату бағытындағы мәлімдемелеріне қазақ дипломаттары да, қоғам белсенділері де байыпты, лайықты жауап беріп жатады. Соңғы кездері біздің депутаттар да елдің тұтастығын мойындағысы келмейтін шетелдік саясаткерсымақтарға батыл тойтарыс бере бастады.
Осы жолы да солай болды. Мәжіліс депутаты Марат Бәшімов қатаң жауап қайтарды
«Біз мемлекеттік Думадағы кейбір депутаттар тарапынан Қазақстанның атына кезекті рет теріс ниетті пікірлер айтылып жатқанын көріп отырмыз. Депутат Федоров, бұған дейін де біздің елдің егемендігі мен аумақтық тұтастығына қатысты өзінің жалған, арандату пікірлерін айтып жүргенімен белгілі адам еді, енді тағы да дәйексіз хайп жасауға көшіпті»,–деп бастаған Марат Бәшімов өз уәжін нақты дәйектермен санамалап шықты.
«Біріншіден, ол сепаратизм үшін лайықты жазасын алған «Петропавлдың халық кеңесі» деп аталатын топқа қатысты үкімге пікір білдіріпті.
Екіншіден, Қазақстанды «заңды сипаты толық емес» аумақ деп атаған. Мұнысына біздің ел тәуелсіздік алғанда «барлық тиісті процедураларды сақтаған жоқ» деп уәж айтады.
Әрине, ақылы толыспаған баланың сөзін айтып отырған Мемдума депутатының бұл арандатуын түсіну қиындау болар, бірақ мен тырысып көрейін.
Федоровтың бұл сөздері тарихқа қайшы. Ол бетсіздігіне салып деректерді өзіне бұрып алып, Кеңес одағының тарау процесі қалай жүргенін әдейі айтпай жасырып қалып отыр.
Осынысымен Федоров өз Президентінің ресми саясатына қарсы сөйлеп тұр. Елімізге соңғы сапары барысында Владимир Путин Қазақстан мен Ресейдің әріптестігі «өзара сыйластық, егемендігін, аумақтық тұтастығын мойындау және ішкі істеріне араласпау принциптеріне негізделеді», – деп атап өткен болатын.
Сондықтан да өзім заңгер ретінде, Ресейдің заң шығарушы билік өкілдері тарапынан мұндай пікір білдіруі орынсыз деп санаймын. Олар бірінші кезекте Ресейдің өзінің позициясына зиянын тигізіп отыр. Ал ол – біздің басты және стратегиялық серіктесіміз. Сондықтан да Федоровтың және сол сияқтылардың қандай да болмасын «психикалық ауытқушылықтарының» емін БАҚ-та немесе Парламентте іздемеу керек, тікелей психиатрия төсегінде жасау керек» – деді депутат.
Қатаң да байыпты жауап.
«Біз кеңестік заманда өткен тарихымыз үшін ешкімнен қуыстанбаймыз, біз – тәуелсіздік алғанын Халықаралық қауымдастық мойындаған елміз.
Мен ресейлік әріптестерімді саяси өте нәзік тақырыптарға сөз сөйлер кезде жақсылап ойланып алуға шақырамын. Сіздердің бізге ортақ болған Кеңестік заман туралы естеліктеріңіз әлдеқашан тек тарих оқулықтарында қап кеткенін естеріңізге салғым келеді», – деген депутат мәлімдемесі қоғамда да қызу қолдау тауып отыр.
Бұл құр байбалам емес, біздегі қоғамдық ойдың өскенін, мемлекетшіл ұстанымның нық орныққанын көрсетеді.
Нұрлан САРСЕНҒАЛИҰЛЫ