Президент әлеуметтік көмекті кімге беру қажеттігі адамның кірісіне емес, шығысына қарап анықталуы тиіс екенін айтты.
Бюджет қаржысы шын мәнінде көмекке мұқтаж адамға берілуі керек – Президент

Қасым-Жомарт Тоқаев азаматтарға әлеуметтік қолдау көрсету жүйесін қайта қараған жөн екенін айтты. Себебі, бюджет қаржысы шын мәнінде көмекке мұқтаж адамға берілуі керек, – деп түсіндірді Мемлекет басшысы.

«Реформа жүргізгенде әлеуметтік көмектің кімге және қалай берілетінін түгел қайта қарау қажет. Яғни, бөлінген қаржыны барынша тиімді жұмсап, оны шын мәнінде көмекке мұқтаж адамға беру керек. Қазіргі таңда 4,5 миллионға жуық адам мемлекеттен әлеуметтік көмек алады. Бұл – шамамен еліміздің әрбір бесінші тұрғыны деген сөз. Басым көпшілігі – еңбекке жарамды азаматтар. Халыққа әлеуметтік көмек береміз деп, біз, шыны керек, қоғамда масылдық психологияға жол бердік. Өркениетті ел боламыз десек, мұндай жағымсыз үдеріске тосқауыл қоюымыз керек», – деді Президент.

Мемлекет басшысының айтуынша, тұратын үйі, тіпті, астында қымбат көлігі бар азаматтарға емес, көмекке зәру адамдарға көмек берілуі қажет.

«Жалпы, азаматтарға әлеуметтік қолдау көрсету жүйесін қайта қараған жөн. Себебі, мемлекеттен көмек алу үшін табысын әдейі азайтып көрсететін адамдар бар. Әлеуметтік көмекті кімге беру қажеттігі адамның кірісіне емес, шығысына қарап анықталуы тиіс. Бұл мәселеде бір нақты шешім қабылдау қажет», – деді Мемлекет басшысы.