Жамбыл облысындағы мектепке "Томирис" лақап атымен белгілі бақсы келген. Мектеп мұғалімдерінен балгермен кездесуге 4 мың теңгеден ақша жиналған, – деп хабарлайды Aikyn.kz.
Белгілі журналист Гүлмира Әбіқайдың жазуынша, бақсының 4 метрлік шлейфі бар көйлегін оқушылар көтеріп жүрген. Ең қызығы ол мектепке көмектесемін деп, оның орнына мектепке жыртылған киім, сынған ойыншықтар мен іске жарамайтын компьютер берген көрінеді.
Бақсы ішімдік пен есірткіге тәуелділіктен емдейді-мыс. "Томирис" мектепке "материалдық көмектен" бөлек 500 мың аударамын деп уәде берген. Алайда ол ақшаны да аудармаған. Ал мектеп мұғалімдерінен 4 мың теңгеден ақша жиналған.
Желідегі ақпаратқа сәйкес, бұл кездесуді аудан әкімдігі ұйымдастырған көрінеді.
Бұл дерекке қатысты Жамбыл облысының Білім беру басқармасы жауап берді.
"Тұрар Рысқұлов ауданындағы Жамбыл атындағы орта мектеп басшылығының мәліметінше, мектеп түлегі Көпбаева Гүлсара Суазқызы аз қамтылған отбасынан шыққан 100 оқушыға қайырымдылық жасайтынын айтқан. 29 тамызда Тереңөзек ауылындағы Мәдениет үйінде "Туған жерге тағзым" атты акция өткен. Онда ауыл тұрғындары да қатысқан. Бұл дерек бойынша Білім басқармасы тексеріс жүргізіп жатыр және қажет шара қабылданатын болады", – делінген ресми ақпаратта.
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.