Telegraph басылымында пилотсыз көліктерге салынатын айыппұлдар туралы жарияланған мақалаға сүйенген Aikyn.kz жүргізушісі жоқ көлік жол ережесін қалай бұзуы мүмкін екенін түсіндіреді.
Өткен жылы Сан-Францискода жүргізушісіз дербес басқарылатын таксилер өздеріне ыңғайлы болғандықтан жол қозғалысы ережелерін бұзған 589 факті тіркелген.
Waymo автономды көліктері Сан-Францискода 65 000 АҚШ доллары (31,2 млн теңге) көлемінде айыппұл төлеген. Бұл қалада 2024 жылдың маусымында роботаксиге қоғамдық көліктермен бірдей қызмет көрсете бастағанына Aikyn.kz бірнеше материал арнаған:
Осындай көлікпен баратын жеріңізге ұйықтап барасыз, оны робот басқарады
Waymo: пилотсыз көліктер адамға қарағанда 200% қауіпсіз
Сан-Франциско қалалық көлік агенттігінің мәліметінше, Waymo компаниясының (Alphabet-ке тиесілі, оның құрамына Google мен YouTube кіреді) автономды көліктері 2024 жылы 589 тұрақ ережесін бұзғаны үшін айыппұл алған. Жол ережелерін сақтамау мына баптар бойынша тіркелген: көліктің рұқсат етілмеген жерлерге тоқтауы; көлік қозғалысына кедергі жасау; көше тазалауға арналған уақытта көшенің шетінде көлікті тұраққа қою.
17 жылдық тәжірибесі бар, 45 жастағы Стерлинг Хейвуд қаңтар айында Mission ауданында тұрақта тұрған Waymo көлігіне айыппұл салғанын айтты.
«Мен көлікте жүргізуші адам бардай сыпайылық таныттым. Екі рет сигнал бердім, бірақ көлік қозғалмады, сондықтан терезесіне 96 долларлық айыппұл ілдім», – дейді жол инспекторы.
Waymo компаниясы роботакси қызметін 2021 жылы Сан-Францискода тестілік режимде іске қосты. Сынақтар сәтті өткен соң, 2024 жылдың маусымында қала билігі роботаксиге қызмет көрсетуге рұқсат берді. Қазіргі уақытта 300-ден астам автономды көлік жолаушыларды тасымалдайды. Алайда көліктің тоқтайтын орындары, тұрақ мәселелері әлі де шешілмеген сияқты.
2024 жылы Сан-Франциско тұрақ инспекторлары жалпы 1,2 млн тұрақ ережесін бұзу фактісін тіркеген, ал айыппұлдардың жалпы сомасы шамамен 119 млн долларды құраған. Бұл адам жүргізетін көліктерге салынған айыппұлдар. Олармен салыстырғанда 589 рет қана тұрақ ережесін бұзған роботакси өте тәртіпті көлік болып көрінеді.
Waymo өкілі автономды көліктердің әлі де әлеуметтік нормалар мен жол ережелерін үйреніп жатқанын айтады. Компания өкілі Итан Тейчер:
«Біз тұрақ ережелерін бұзудан барынша аулақ болу қабілетін жетілдіріп жатырмыз. Біз қауіпсіздікті бірінші орынға қоямыз, әсіресе жолаушыларды алып кету немесе түсіру кезінде. Көліктер заңды тұрақ орындарын тануға қабілетті, бірақ жолаушыны түсіру үшін кейде ыңғайлы түсіру аймағына тоқтауы мүмкін», – дейді.
Сан-Франциско билігі автономды көліктердің жедел қызмет машиналарының қозғалысына кедергі келтіретінін де мәлімдеген. Осы себепті қала билігі Waymo-дан бақылауды күшейтуді талап етуде. Бұл компанияның көліктерінің қауіпсіздігіне байланысты Aikyn.kz
Такси жолаушыларды тегін таситын болды
Waymo пилотсыз көлігі велосипедшіні қағып кетті (видео) атты материалдар жариялаған.
Артқы есігі толық жабылмаса, роботакси орнынан қозғалмайды. Фото nbcnews.com сайтынан алынды. Авторлығы: AP / Terry Chea
Қазіргі Калифорния заңнамасына сәйкес, автономды көліктерге жол жүру ережелерін бұзғаны үшін (жылдамдықты асыру, жаяу жүргінші өткелінде тоқтамау) айыппұл салынбайды, өйткені бұл ереже тек жүргізушіге қатысты. Ал 2026 жылдың шілдесінен бастап жаңа заң күшіне енеді, сонда автономды көлік иесі – компаниялар да ереже бұзылған жағдайда жауапкершілікке тартылады. Дегенмен техникалық ақаулық болмаса, жол ережесін бұзбауға бағдарланған роботаксидің эмоцияға беріліп, ереже бұзуы мүмкін болмас.
Waymo өз тарапынан қауіпсіздік – басты басымдық екенін айтады және айыппұлдарды толықтай өтейтінін растады.
P.S. Осындай технологиялық жаңашылдықтарға жақын екенін көрсетіп, қып-қызыл Tesla Model S көлігін сатып алған Президент Дональд Трамп өзінің мейірімді, қамқор ата екенін көрсетті. Америка басшысының қасында еркелеп жүрген Илон Масктің 4 жасар баласы X Æ A-Xii. Балдырғанның аты былай оқылады: Икс Эш Эй-Твелв. Видео кеше (14 наурыз) Ақ үйдің шалғынында түсірілген:
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.