Атырау облысында дрон арқылы түзету мекемесіне тыйым салынған заттарды жеткізумен айналысқан 39 жастағы ер адам ұсталып, сот үкімімен бас бостандығынан айырылды, – деп хабарлайды Aikyn.kz сайты.
Атырау облысы прокуратурасының үйлестіруімен полиция департаментінің Ұйымдасқан қылмысқа қарсы күрес басқармасы және өзге де құқық қорғау органдары «Қару» жедел-профилактикалық іс-шарасы аясында күдіктіні қолға түсірген.
Полицияның мәліметінше, күдіктінің тұрғылықты мекенжайын тінту барысында тіркелмеген 12 калибрлі екі ұңғылы аңшылық мылтық, 12 калибрлі кесілген бір ұңғылы мылтық, 4 дана оқ-дәрі, 3 дрон, бекіре тұқымдас балықтың уылдырығы салынған пластикалық ыдыс, сондай-ақ өсімдік тектес қою жасыл түсті зат тәркіленген.
Аталған дерек бойынша сотқа дейінгі тергеп-тексеру жүргізіліп, қылмыстық іс сотқа жолданды.
Соттың үкімімен айыпталушы кінәлі деп танылып, оған бас бостандығынан айыру жазасы тағайындалды.