Иранмен одақтас Йемен хуситтері елдің оңтүстігіне қарай жылжып, әлемдік теңіз саудасы үшін аса маңызды Баб-эль-Мандеб бұғазына бақылау орнатуға мүмкіндік беретін аумақтарға жетті. Бұл АҚШ пен Иран арасындағы қақтығыс жалғасып жатқан тұста Вашингтонға жаңа мәселе туғызып отыр, деп хабарлайды Reuters.
Хуситтер жұма күні Йемен мен Африка арасындағы Баб-эль-Мандеб бұғазының ортасында орналасқан Перим аралына жеткен. Бұған дейін олар Қызыл теңіз жағалауындағы Моха қаласын басып алып, оңтүстікке қарай ілгерілеген еді.
Баб-эль-Мандеб әлемдік саудадағы маңызды теңіз жолдарының бірі саналады. Reuters дерегінше, бұл бағыт арқылы әлемдік мұнай жеткізілімінің шамамен 7 пайызы және жаһандық сауданың 12 пайызы өтеді. Егер хуситтер бұғазды жауып тастаса, мұнай тасымалы қиындап, энергия бағасына қосымша қысым түсуі мүмкін.
Жағдайдың күрделенуіне Ормуз бұғазындағы ахуал да әсер етіп отыр. АҚШ пен Иран арасындағы соғыс салдарынан бұл бағыттағы тасымал бұған дейін айтарлықтай шектелген. Соғысқа дейін Ормуз бұғазы арқылы әлемдік мұнай жеткізілімінің шамамен бестен бірі өткен.
Reuters дереккөздерінің мәліметінше, Сауд Арабиясының тақ мұрагері Мұхаммед бен Салман АҚШ президенті Дональд Трамппен телефон арқылы сөйлесіп, хуситтерге қарсы әскери көмек сұраған. Вашингтон әзірге қақтығысқа тікелей араласудан бас тартып, барлау ақпаратын беруге дайын екенін жеткізген.
АҚШ үшін жағдай екіұшты болып отыр. Бір жағынан, Баб-эль-Мандеб арқылы кеме қатынасының тоқтауы мұнай бағасының өсуіне және әлемдік сауданың бұзылуына әкелуі ықтимал. Екінші жағынан, хуситтерге қарсы жаңа әскери операция АҚШ күштеріне қосымша салмақ түсіреді және Йемендегі қақтығысты одан әрі кеңейтуі мүмкін