Депутат алдымен президенттің газдандыру қарқынын жеделдетіп, халықты табиғи газбен қамту деңгейін 80 пайызға жеткізуді тапсырғанын еске салып, бастаманың маңызына тоқталды. Өйткені газдандыру ауылға газ құбырын тарту ғана емес. Ол ауыл мен қала арасындағы тұрмыс сапасы алшақтығын қысқартуға, экологиялық жағдайды жақсартуға, жергілікті кәсіпті дамытуға және өңірлердің экономикалық тартымдылығын арттыруға жағдай туғызады. Сонымен қатар энергетикалық қауіпсіздікті күшейтіп, ауылдан қалаға көші-қон үдерісін тежеуге мүмкіндік береді.
– Осы тұрғыдан алғанда, бұл бастама «Әділет» партиясының сайлауалды бағдарламасындағы «Өңірлер мықты болса – ел мықты» басымдығымен де үндеседі. Бүгінде Алматы және Жетісу облыстарын табиғи газбен қамтамасыз ету – өзекті мәселенің бірі. Мемлекет басшысы да бұл мәселеге айрықша мән беріп отыр. Сондықтан өңірлердегі газдандыру жұмысына жаңа қарқын беруіміз қажет, – дейді Нұрбақыт Теңізбаев.
Атап айтқанда, депутаттың сөзінше, Алматы облысында 27, Жетісу облысында 44 газдандыру жобасының құжаттамасы әзірленген. Сонымен қатар таулы және шекаралық аймақта орналасқан Кеген, Райымбек аудандарының тұрғындары мен әлеуметтік нысандарын қатты отынға тәуелділіктен арылту үшін стратегиялық маңызы бар «Шелек – Кеген – Нарынқол» магистралды газ құбырының жобасы жасалған. Бұдан бөлек, Қонаев қаласының жаңа аудандары мен инвестициялық нысандарын дамытуды көздейтін «Жаңа Іле» автоматтандырылған газ тарату стансасының жобасы қарастырылған.
Дегенмен депутаттың пікірінше, аталған жобаларды іске асырудың ұзаққа созылу қаупі бар. Жобалық-сметалық құжаттамалар бойынша мемлекеттік сараптама қорытындысы 2024 жылы алынған. Егер бұл жобаларды мемлекеттік бағдарламалар аясында қарастыру мерзімі кешіктірілсе, құжаттаманың ескіруіне және оларды түзету мен сараптамадан қайта өткізу қажеттілігіне алып келеді. Бұл өз кезегінде жобаның бірнеше есе қымбаттауына және белгіленген мерзімде аяқталмауына әкеледі.
Сондықтан депутат аталған министрліктерден бірқатар шараны талап етіп отыр. Мәселен, Алматы және Жетісу облысында әзірленген газдандыру жобаларының техникалық құжаты ескірмей тұрып, оларды мемлекеттік даму жоспары аясында кезең-кезеңімен іске асыру қажет. «Шелек – Кеген – Нарынқол» магистралды газ құбыры мен оған қажетті инфрақұрылымды стратегиялық маңызы бар жобалар қатарына енгізу мәселесін қарастырған жөн. Сондай-ақ Нұрбақыт Теңізбаев Қонаев қаласының қарқынды дамуын ескере отырып, «Жаңа Іле» АГТС жобасын өңірдің инфрақұрылымдық даму жоспарына енгізуді ұсынып отыр.