Пандемия кезінде әр өңірдегі ерікті жастар дәрігерлер мен науқастарға көмек жеткізіп отырғанын білеміз. Сондықтан қысылтаяң шақта ақ халаттылардан кейін еңбегі сіңген жандар ретінде волонтерлерді атап өткен жөн. Бұл жайлы Мемлекет басшысы Қасым-Жомарт Тоқаев Қазақстан халқына Жолдауында айтқан болатын.
– Біз азаматтардың өмірін және денсаулығын қорғау үшін бар күш-жігерімізді біріктірдік. Осындай сын сағатта ынтымағы жарасқан халқымыз жұдырықтай жұмылды. Осы қиын сәтте біздің тату халқымыз бірікті. Індетпен күрес дана халқымызға тән асыл қасиеттердің арқасында жүзеге асты. Өзгеге қол ұшын созып, тілеулес болу, тосыннан келген кеселге қарсы тұру маңызды екені анық байқалды. Дәрігерлерге, құқық қорғау органдарының қызметкерлеріне, әскери қызметшілерге, еріктілерге, кәсіпкерлерге және осындай шақта бейжай қалмаған барша азаматтарға шын жүректен алғыс айтамын. Сіздер айрықша табандылықтың және зор жауапкершіліктің жарқын үлгісін көрсеттіңіздер. Бұл Отанға деген шынайы сүйіспеншіліктің көрінісі деп санаймын, – деген еді Президент.
Осы орайда «Қазақстан волонтерлер лигасының» төрайымы Айсұлу Ерниязова еріктілер игі іс бағытында әрқашан жұдырықтай жұмыла береріне сенім білдіріп, Мемлекет басшысының Жолдауын орындауда жастар күш біріктіретінін жеткізді.
– Жуырда ғана Мемлекет басшысы Қасым-Жомарт Кемелұлының Қазақстан халқына кезекті Жолдауын тыңдадық. Сонда бір аңғарғанымыз – жастардың бойында еңбек құндылығына деген қабілетті арттыруымыз тиіс екен. 2013 жылы «Еріктілер лигасын» құрудағы мақсатамыз да осы еді. Жастардың жобасына қолдау білдіру жайлы ой сол кезде туындады. Мысалы, EXPO-2017 Халықаралық көрмесінің кезінде волонтерлердің атқарған қызметі көп болды. Көрмеге қатысқан әрбір бесінші волонтер біздің «Еріктілер лигасының» мүшесі еді. Сондықтан қоғамдық қызмет көрсету, елдің дамуы бағытындағы жобаларға еріктілерді көптеп тартқанымыз жөн. Бұл тұрғыда «Jas Otan» Жастар қанатын үлгі етсек болады, – деді ол.
Сонымен қатар Biz Birgemiz акциясы да пандемия кезінде ел азаматтарына демеу болды. Акция арқасында 550 мыңнан астам отбасыға көмек көрсетілді. «Дәрігерлерге мың алғыс!» шарасын қолға алған еріктілер акция аясында дәрігерлерге азық-түлік жеткізіп, бар күш-жігерін салған болатын. Енді волонтерлерге де жаңа мүмкіндіктер ашылмақ. Бұдан былай еріктілер өз жобасын ұсынып, соның арқасында 107 шағын гранттың бірін ұтып алуға мүмкіндік алады. Бұл туралы жиында «Еріктілер лигасының» үйлестіру кеңесінің мүшесі Азиз Оралбекұлы айтты.
– Шағын гранттар байқауы «Ашық Жүрек» жобасы аясында өткізіледі. Жобаға Ақпарат және қоғамдық даму министрлігі қолдау білдіріп отыр. Барлығы 107 шағын грант бар. Қазақстан Республикасының барлық өңірі бойынша бастамашыл топтар үшін 300 000 (үш жүз мың) теңгеден 56 шағын грант, 300 000 (үш жүз мың) теңгеден 42 шағын грант 14 облыстың волонтерлері мен волонтерлік ұйымдары үшін беріледі. 500 000 (бес жүз мың) теңгеден 9 грант республикалық маңызы бар қалалардың волонтерлеріне арналған, – деді ол.
Шағын гранттар конкурсына қатысуға жеке тұлғалар, бастамашыл топтар, сондай-ақ Қазақстанның үкіметтік емес ұйымдары да қатыса алады. Барлық үміткер liga.org.kz. платформасына тіркеліп, толығырақ ақпаратпен танысуына болады. Қазіргі кезде Қазақстанда 200-ден аса еріктілер ұйымы бар екен. Олардың қатарын көбейту – әлі де басты мақсаттың бірі. Осы орайда Қазақстан Волонтерлер лигасы Нұр-Сұлтан қалалық филиалының директоры Сұлтан Аллабергенов жастарды еріктілер қатарына қосылуға шақырды.
– Біз әр жалынды жасты волонтерлер қатарына қосылуға шақырамыз. Ерікті болып, елге көмек еткен жақсы һәм маңызды! Әрі қоғам үшін көп пайда әкеледі. Мейлі, бір-екі сағатын қиса да, азаматтардың көмегі ел алдында абыройын көтеретіні анық, – дейді.
Мадияр ТӨЛЕУ
