Қарағанды мен Теміртауда банктің клиенттерін 40 млн теңгеге алдаған күдіктілер қолға түсті. Қарағанды облыстық полиция департаментінің мәліметінше, 18 мамырда полиция мен қауіпсіздік қызметінің бірлескен іс-шарасы барысында қала орталығында орналасқан банкоматта 32 жастағы азамат ұсталды.
«Ер адам басқа біреудің банк картасын пайдаланып, жәбірленуші тараптың несие ретінде берген ақшасын алмақшы болып, алаяққа аударған. Тергеу барысында ұсталған азаматтан 10 миллион теңгеге жуық ақша тәркіленді», – деді Қарағанды облысының полиция департаменті бастығының орынбасары Әбіл Әбілдин.
Сонымен бірге, Теміртауда криминалдық полиция қызметкерлері тәртіп сақшылары оның сыбайласы ретінде 33 жастағы ер адамды ұстады.
«Қала тұрғыны серіктесінен 20 000 теңге ақы алып, банк картасын алған адамдарды тауып беру арқылы көмек көрсетіп, одан әрі пайдалану үшін картаны ұсталған азаматтарға тапсырып отырған», – деп түсіндірді ПД.
Полицейлердің хабарлауынша, ақпан айынан бастап осы уақытқа дейін департаменттің аумақтық бөлімшелеріне ірі көлемдегі алаяқтық фактісі бойынша төрт арыз түсіп, 40 миллион теңгеге жуық залал келтірілген.
«Тінту кезінде ұсталғандардан түрлі банктердің жеті төлем картасы, ұялы телефондар, флеш және сим-карталар, сондай-ақ интернет-роутерлер тәркіленді. Олар уақытша ұстау изоляторына қамалды», - деп хабарлады полициядағылар.
Оларға қатысты Қылмыстық кодекстің 190-бабы (алаяқтық) бойынша сотқа дейінгі тергеу амалдары жүргізілуде.
