– Альбина қазір Тараз қаласындағы №46 мектептің 8-сыныбында оқып жатыр. Банктегі қаржысын кәмелет жасқа толғанда ала алады. Қыздың жағдайы жақсы. Озат оқушылардың бірі. Одан бөлек, облыс әкімі болмай тұрған кезінде Нұржан Нұржігітов те Кан-кан Елона есімді қызды қамқорлығына алған болатын. Ол кісі де қолдан келген көмегін аямауда. Жалпы біздің орталықта 75 бала тәрбиеленіп жатса, соның 49-на тәлімгер бекітілген. Биыл аудан әкімдері қалған балаларды қамқорлығына алатындығы айтылған. Бұйырса, барлық бала «Мейірім» жобасының шарапатын көреді деген үміттеміз, – дейді Өмірлік қиын жағдайдағы балаларды қолдау орталығының директоры Айжан Дүкембайқызы.Орталық басшысының айтуынша, балалар мен тәлімгерлердің жүздесуі жиі ұйымдастырылып тұрады екен. Тәлімгерлердің сөзіне сүйенсек, есепшотына қаржы аударғаннан кейін балаларды бірде-бір рет көрмегендері де бар.
– Сол тұста менің жауапкершілігіме екі бала берілген болатын. Екеуінің де тиісті қаржысын аударып бердім. Алайда одан кейін балаларды көрмедім. Бір жағынан жұмыс басты болғаннан кейін оған да уақыт табыла бермейді. Бірақ басқосулар болып жатса қалмауға тырысамыз. Ал жоба 2020 жылдан кейін жалғасты ма, жоқ па, ол жағын білмеймін, – дейді Қазақстанның Еңбек Ері Мұқаш Ескендіров.Облыстық мәслихат хатшысы Махметғали Сарыбеков те жоба жанданған жылы тиісті қаржысын аударып, одан кейін жауапкершілігіне берілген баланы көрмепті. Осы тұста, жоба аясында өңір бойынша нақты қанша балаға қаржы аударылғанын білмек мақсатта Жұмыспен қамтуды үйлестіру және әлеуметтік бағдарламалар басқармасына хабарластық.
«Облыста 2020 жылдың қыркүйек айынан бастап жетім және ата-анасының қамқорлығынсыз қалған балаларға арналған «Мейірім» жобасы іске асырылуда. Өңірдегі жетім және ата-анасының қамқорлығынсыз қалған балаларға арналған 4 мекемедегі 137 балаға әлеуметтік қолдау көрсету мақсатында 96 мекеме мен жауапты тұлғалар бекітілген болатын. Тізім бойынша «Отбасы банкінде» 137 баланың барлығына арнайы есепшот ашылды. Сондай-ақ Тараз қаласы мен аудандардағы отбасылық тәрбиеде жүрген 1 194 балаға әлеуметтік қолдау көрсету мақсатында 1 012 демеушілермен жұмыстар жүргізілді. Бүгінде «Мейірім» жобасы аясында 1 331 баланың «Отбасы банкінде» ашылған шоттарына бекітілген мемлекеттік мекемелер мен ірі кәсіпорындардан 48 миллион 500 мың теңгеден астам қаражат аударылды. Жиналған ақшаны бала кәмелет жасына толғаннан кейін ғана өмірлік қажеттілігіне жұмсай алады», – дейді басқарманың баспасөз қызметі.Мамандардың сөзіне сенсек, жоба бір күнге де тоқтамаған көрінеді. Бұл, әрине, жанға жылу береді. Алайда биылғы аударым туралы толық ақпарат жоқ. Тек Любовь Тимофеева есімді жасөспірімнің есепшотына 80 мың теңге құйылғанын білдік. Ал Өмірлік қиын жағдайдағы балаларды қолдау орталығының директоры Айжан Дүкембайқызы биыл аудан әкімдері бір-бір баланы жауапкершілігіне алу қажет болғанын айтып отыр. Әрине, жоба ешкімді қаржы аударуға міндеттемейді. Дегенмен орталықта тәрбиеленіп жатқан бір бала «Мейірімнің» шарапатын көріп жатқанда, екіншісі елеусіз қалмаса екен дейміз. Өйткені бұл бала психологиясына теріс әсет етуі мүмкін. Сондықтан әкім ауысса да, жобаға тәлімгерлер жауапкершілікпен қараса екен. Сондай-ақ, тек қаржы аударуды ғана мақсат тұтпай, жомарт жандар балаларға жақын болса деген тілегіміз бар. Өйткені, өмірі қиын жағдайдағы балаларға, ең әуелі, аялы алақанның жылуы қажет.
Жамбыл облысы