Жаңалықтар A-newspaper Әлеумет

Асыраушы сала алшаң басқан аймақ

Асыраушы сала алшаң басқан аймақ
Асыраушы сала алшаң басқан аймақ
546
оқылды
Жамбыл облысы биыл әлеуметтік-экономикалық даму көрсеткіші бойынша өңірлер арасында алдыңғы қатардан көрінді. Бұл жөнінде Премьер-Министр Әлихан Смайыловтың төрағалығымен өткен Үкімет отырысында айтылды. Ұлттық экономика министрі Әлібек Қуантыровтың айтуынша, барлық көрсеткіштер бойынша оң өсім 6 аймақта байқалған. Оның ішінде Жамбыл облысы жоғары көрсеткіш көрсеткен. Экономикалық көрсеткіш көш бастап тұр Ұлттық экономика министрінің айтуынша, ағымдағы жылдың қаңтар-қырқүйек айларында еліміздегі өндіріс көлемі 4,6 пайызға өскен. Соның ішінде ең жоғарғы көрсеткіш Жамбыл облысында байқалып отыр. Атап айтсақ, есепті кезеңде өңірдің экономикалық өсімі 106,8 пайызды құраған. Ал республикалық меже 103,5 пайыз­ды ғана көрсеткен. Бұл ретте өнеркәсіп өндірісінің көлемі 112,4 пайыз деңгейінде (639,2 млрд теңге) қалыптасса, ауыл шаруашылығында 431,3 млрд теңгенің өнімі өндіріліп отыр. Өсім – 105,5 пайыз. Жыл басынан Жамбыл об­лысына 293,6 млрд теңге инвес­тиция тартылса, бұл өткен жылмен салыстырғанда 7,5 пайызға артқа­нын айғақтауда. Дәл сондай құры­лыс көлемі 149,0 млрд теңгені құ­рап, 8,7 пайызға артқан. Сондай-ақ, облыстық эко­номика және бюджеттік жоспарлау басқармасының мәліметінше, бюджет кірісі – 402,5 млрд теңгеге орындалып, 1,1 пайызға, өзіндік кіріс – 88,1 млрд теңгені құрап, 15,5 пайызға көбейген. Облыс бойынша бюджеттік қаражаттар 98,6 пайызға игерілген. Өз кезегінде облыс әкімі Нұр­жан Нұржігітов барлық саладағы жұмыстарды тұрақты бақылауда ұстап, жыл қорытындысы бойынша да даму динамикасын сақтауды жауапты мамандарға мықтап тапсыруда. Пилоттық жобаның пайдасы мол Жамбыл облысы аграрлық аймақ болғаннан кейін экономика­лық өсімде асыраушы саланың алар орны ерек. Бұл тұрғыда «Тұрғын­дардың тұрмыстық табысын арттыру» пилоттық жобасының пайдасы орасан. Ал жоба жемісті жанданып жатқан өлке ретінде Қордай ауданын баса айтуға бо­лады. Мәселен елді мекен тұрғын­дарына 2,5 пайызбен жалпы көлемі 704,1 млн теңге несие берілген. Нәтижесінде 950 аула үй іргесіндегі жерді тиімді игеріп отыр. Жоба аясында ауылдықтар 4 193 бас мал сатып алса, орташа табыс көлемі 500 мың теңгеден асып, жұмыссыздар саны 2,5 есеге азай­ған.
– Жобаға дейін округте 131 жеке кәсіпкер тіркелсе, несиелен­дірудің аясында 381-ге көбейді. 83 тұрақты жаңа жұмыс орындары ашылды. Атаулы әлеуметтік көмек алушылар саны 113 отбасыға азайды, – дейді Қордай ауданының әкімі Мәден Мұсаев.
Жүйелі жұмысты жуырда елді мекенге жұмыс сапарымен барған облыс әкімі Нұржан Нұржігітов те оң бағалады. [caption id="attachment_223411" align="aligncenter" width="1634"]асыраушы сала © коллаж: Елдар Қаба[/caption] – Ет, сүт өнімдерін өткізуде делдалсыз, тікелей өткеруді ұйымдастыру керек. Әрбір пайда ауыл тұрғындарының қалтасына түсуі қажет. Бұл жобаның тәжірибесін Мем­лекет басшысының өзі қолдап, ел көлемінде таратуды тапсырып отыр. Осындай игі бастама аясын­дағы жұмыстарды жүйелей түсу керек.
Ауыл әкімі елді мекендегі әр отбасының жағдайынан хабардар болуы тиіс. Мемлекет қолдауларды ауылдықтар сезінуі маңызды. Ол үшін ауыл әкімі барлық жеңілдіктер мен мемлекеттік бағдарламалардың мүмкіндігін өзі жете түсініп, халық­қа жеткізуі қажет, – деді Нұржан Нұржігітов.
Асылтұқымды мал шаруашылығы дамып келеді «Мал өсірсең қой өсір, өнімі оның көл-көсір» дейді дана қазақ. Қазір Жамбылда асылтұқымды қой шаруашылығын дамытып, толағай табысқа кенеліп отырған шаруалар аз емес. Сондай қожалықтың бірі – Меркі ауданындағы «Ниет» шаруа қожалығы. Бұған дейін егін шар­уашылығымен айналысып келген қожалық енді асылтұқымды мал шаруашылығын дамытуды қолға алған. Өткен жетіде аталған шаруа­шылық Ұлытау облысынан 800 бас асылтұқымды Еділбай қойын әкелді. Оның 700 басы тұсақ, 100 басы – тоқты. Барлығы – аналық бас.
– Қой ұсақ мал болғанымен, пайдасы едәуір көп. «Кисең киім, жесең тамақ» болатын қой шаруа­шылығының берері мол. Мұндағы бар мақсатым – мал тұқы­мын асыл­дандыру жұмыстарын дамыту. Көзін тапқан адамға кәсіп – нәсіп алып келеді, – дейді «Ниет» шаруа қожалығының басшысы Тәуіржан Алтынбаев.
Меркі ауданының тұрғындары бұл іске қуанып, оң көзқарас танытып отыр. Адал еңбекпен айналысқан адам көздеген мақ­сатына жетеді деген – осы. Айта кету керек, облыста бүгінгі күні 3,3 млн бас қой болса, ондағы асылтұқымды қойдың үлес салмағы 28,3 пайызды құрайды. Ал, асыл­тұқымды қой өсірумен 993 шаруа­шылық айналысса, онда 414 мың бас қой бар.

Жамбыл облысы