– Байзақ ауданындағы Сарыкемер ауылында тұрып жатқандықтан, ұлым көлігімді жұмысқа мініп, барып келетін. Сол күні де көлікті айдап жұмысына кеткен. Ұлым қас қарайғанша оралмағандықтан, уайымдай бастадық. Облыс орталығында бүлік болып жатқанын естіп, бара да алмадық. Тек ертесіне көлікті облыс әкімдігінің ғимаратының артынан таптық. Төрт дөңгелегін шығарып, ішіндегі дүниелермен қоса бүкіл бөлшектерін алып кетіпті. Содан көліктің шығынын есептетіп, 1 031 000 теңге көлемінде мемлекеттен төлем алдым, – дейді Жолшыбек.Негізі, Жолшыбек қарияның өзі де құқық саласының ардагері. Әке жолын қуған баласының сол күнгі ерлігін де әке жүрек ерекше толғаныспен еске алады.
– Балам сол кезде Пушкин көшесіндегі полиция бөлімінде жұмыс істейтін. Облыс әкімдігінің ғимаратын қорғауға шақырғанда ол өз көлігімен барып, тұраққа қойған екен. Бүлік басталғанда көлігін алып шығуға ұмтылғанымен, өзіне қарсы жүгірген жүздеген бұзақыға қарсы тұра алмапты. Жоғары жақтан «әкімдік ғимаратынан кетіңдер» деген бұйрық келгенде бұлар әріптестерімен бірге Қарахан кесенесіне дейін қашып барған. Осы жерде біраз уақыт бой тасалағаннан кейін өздері жұмыс істейтін полиция бөліміне баруға бекінеді. Барса бөлімде тек қыздар ғана қалған екен. Қаракөздеріміз стратегиялық нысан саналатын полиция бөлімін қорғауға бел буып отырғанын көріп, жігіттер оларды қайтаруға тырысады. Содан бір көлікті ұйымдастырып, бүкіл қызды соның ішіне салып жіберген. Ал өздеріне шегіну туралы бұйрық келгенде балам бастаған жігіттер полиция бөліміндегі бүкіл қару-жарақты бір көлікке салып, тығып тастайды. Мұндай қадамға олар облыстық Полиция департаментінің қару-жарақ қоймасының тоналғанын естігеннен кейін барған. Алайда бәрі басылғаннан кейін қару-жарақты толықтай қайта әкеліп өткізген. Осы ерлігі үшін оларды медальға да ұсынған. Бірақ Қаңтар оқиғасының қасіретін таразылаған жоғары жақ бұл ұсынысты қолдамады, – дейді қария.Жолшыбектің ұлы қазір туған ауылы Сарыкемер елді мекенінде қызметін жалғастыруда. Батыр жігіт әлі үйленбеген. Қанды қақтығыстан ұлының аман шыққанына шүкірлік еткен ата-ана енді оның өз алдына отау құруын тілеп отыр. Төрт қыздан кейінгі жалғыз ұлынан Жолшыбек қария немере сүюді армандайды. Иә, Қасіретті қаңтар оқиғасында біз білмейтін осындай оқиға көп. Жолшыбек ақсақал бүліктен кейін ұлының тергелгенін де жасырмай отыр. Абырой болғанда, баласы ақталып шығыпты. Қария ұлына қатысты әділ шешім шығарып, тоналған көлігінің құнын өтеп берген Үкіметке алғысын айтып, енді мұндай қасіреттің қайталанбауын тілейді.
Жамбыл облысы