Үндістанда бұрын қолданылған смартфондарды сатуда iPhone үлесі 11%-ды құрады. Азияның екінші ірі экономикасында Apple өзінің үлесін көбейтуде жаңа стратегия қабылдағанға ұқсайды.
Жаңартылып екінші рет сатылатын iPhone-ға Үндістанда сұраныс күшейіп, сатылымы едәуір өскен. Бұл, әрине, бағаның төмен болуынан. Aikyn.kz өз тұжырымын Financial Times басылымында жарияланған талдауға сүйеніп жасайды.
Фото in.mashable.com сайтынан алынды
Counterpoint Research нарықты зерттеу тобының мәліметі бойынша, Үндістандағы қолданылған смартфондар нарығында iPhone-ның үлесі 11%-ды құраған, яғни 2021 жылмен салыстырғанда 3%-ға жоғары.
Қазір iPhone «Үндістандағы ең жылдам дамып келе жатқан жаңартылған брендке» айналды. Болашақта Apple Үндістанға үлкен үміт артуда. Өйткені АҚШ-тың технологиялық алыбы әлемдегі үшінші ірі смартфондар нарығындағы өз үлесін ұлғайтуға тырысады.
Apple-дың Бас директор Тим Кук Үндістан премьер-министр Нарендра Модимен сәуір айында елде өз компаниясының алғашқы екі дүкенін ашқан кезде кездесті. iPhone өндірушісі Қытайдағы зауыттарына тәуелділікті жеңілдету үшін жаңадан пайда болған үнділік өндіріс орнын кеңейтуге мүдделі болып отыр.
Фото Bloomberg сайтынан алынды. Авторы: Prakash Singh
Ал Apple компаниясының Үндістандағы жаңа смартфондар үлесі 2019 жылғы 1 пайыздан өткен жылы 5 пайызға өсті. Сұраныс сән-салтанатқа қойылатын бағамен шектелген, жаңа iPhone-ның орташа сату бағасы 80 000 рупий немесе 1 000 долларға жуық.
Бірақ бренд Apple өнімдері мен қызметтерінің желісіне кіретін қақпа ретінде қызмет ететін пайдаланылған смартфондар нарығында бұрын-соңды болмаған қызығушылықты бастан кешірді. Жаңартылған iPhone телефондары «ыстық бәліштер сияқты сатылуда» дейді Мумбайдағы Counterpoint талдаушысы Глен Кардоза. Зерттеу нәтижелері 2022 жылы 20%-ға өскенін көрсетті, бұл әлемдік орташа көрсеткіштен төрт есе артық.
2014 жылы шығарылған iPhone 6 сияқты ескі құрылғылар Үндістан нарығында үшінші немесе төртінші рет сатылып, қолдан-қолға өтетін өнім болған. Ал 5G үлгілері – iPhone 12 және одан жоғарылары, әсіресе бағалы болған.
Фото Getty Images сайтынан алынды. Авторы: Tsering Topgyal
«Болашақта iPhone смартфондарын сатып алғысы келетін тұтынушылар әдетте қолданылған iPhone телефондарын сынау үшін, оларды қалай пайдалану керектігін үйрену үшін сатып алатындар», – дейді қайта жөнделген және бұрын қолданылған Apple өнімдерін сататын Мумбайдағы Prowesses Enterprises компаниясының сату бөлімінің басшысы Девен Мехер.
Жаңа смартфондар сатылымына келетін болсақ, Apple осы жылы жаһандық сатылымды көбейтеді деп күтілетін жалғыз ірі компания. Бұл негізінен Үндістанға байланысты, мұнда iPhone сатылымдары 2023 жылы 31%-ға өседі деп күтілуде. Counterpoint мәліметтері бойынша, Қытайдағы өсім 2%-ға және АҚШ-та сатылым бұрынғы қалпында қалады.
«Қолданылған iPhone-ның танымалдылығы оның бәсекелестермен салыстырғанда сенімділігіне байланысты», – дейді сарапшылар. Жаһандық деңгейде Apple-ға қайта қалпына келтірілген смартфондар нарығының жартысы тиесілі.
Бангалордағы Redseer Strategy Consultants компаниясының аға кеңесшісі Харшит Пандей: «Apple – бұл қайта сату құны әлдеқайда жоғары бренд» екенін айтады. iPhone мүлдем ескіргенше үш-төрт қолдан өтеді екен.
Фото Getty Images сайтынан алынды. Авторы: Triloks
Сарапшылардың пікірінше, iPhone-ның екінші нарықтағы өсуі айтарлықтай жоғары болуы мүмкін, бірақ сатылым көлемі екі негізгі фактормен шектеледі.
Қазіргі уақытта Android жүйесі басым елде жаңартылған iPhone-дардың шағын базасы бар. Сонымен қатар Дели 2012 жылдан бері отандық өндірісті қолдау саясатын жүргізуде, сондықтан қолданылған ескі телефондарды шетелден импорттауға айтарлықтай шектеу қойған.
Apple соңғы 10 жылдықта өзінің ескі өнімдерін тұтынушылардан қабылдап, оларды жаңа модельдерге ауыстыру бағдарламасын жүргізіп келеді. Бағдарлама iPhone иелерін ұзақ уақыт брендті қолдануды ынталандыру мақсатында жасалған. CyberMedia Research салалық талдау бөлімінің басшысы Прабху Рамның айтуынша, «Apple үнділік сатып алушыларды қызықтырады. Брендтің танымалдығы мен үнді нарығындағы мәртебесі шынымен де күшті».