Нұр-Сұлтан қаласындағы Ұлттық академиялық кітапханада Президент Қасым-Жомарт Тоқаевтың ұлықтау рәсімінде көтерген ұтымды бастамалары мен алға қойған міндеттерін жүзеге асыру мақсатында Қазақстан халқы ассамблеясы кеңесінің кеңейтілген отырысы өтті.
Жиынға ҚХА төрағасының орынбасарлары Ю.Келигов, Ш.Пулатов, Мәжіліс төрағасының орынбасары В.Божко, сонымен қатар Мәжіліс депутаттары, ҚХА кеңесінің мүшелері, қоғам қайраткерлері, ғылыми және шығармашылық қауым өкілдері қатысты. Кездесуді Қазақстан халқы ассамблеясы Төрағасының орынбасары – Президент Әкімшілігі ҚХА хатшылығының меңгерушісі Ж.Түймебаев ашып, басқарды. Шара барысында Мемлекет басшысы атап өткен бірқатар маңызды басымдықтарды, мәселелерді толыққанды бөліп көрсетті.
Сондай ақ, Ж.Түймебаев «Қасым-Жомарт Тоқаевтың ұлықтау рәсімінде сөйлеген сөзі – Қазақстанның қазіргі заманғы тарихының басталу нүктесі. Бұл сөз азаматтарымыздың негізгі сұрауларына айқын және түсінікті жауап болды» деген пікір білдірді.
В.Божко, Ю.Келигов, Ә.Ахметов, М.Споткай сынды кеңес мүшелері өз ойларымен бөлісіп, пікір алмасты. Жалпы алғанда, ассамблея кеңесі елдегі үдерістерге кең қоғамдық қолдау көрсетуі керек. Отырыс әлеуметтік үйлесім мен ұлттық бірлік мәселелеріне аса назар аудару қажет деген шешіммен аяқталды.
Айша ЕРСҰЛТАН