Мен тірімін ғой - ақтөбелік азамат дәрігерлердің салғырттығынан өлілер тізімінде жүр
Мен тірімін ғой - ақтөбелік азамат дәрігерлердің салғырттығынан өлілер тізімінде жүр
Ақтөбеде дәрігерлер тірі адамды өлілердің қатарына қосып жіберген. Соның кесірінен 68 жастағы Ромахан Кенжебаевтың бар құжаты жарамсыз болып қалған. Тіпті есепшотындағы зейнетақысы мен айлығын да ала алмай отыр, – деп хабарлайды КТК арнасы. Ол өзін сырттай о дүниеге аттандырғандардан "қайта тірілтуді" талап етеді. Қаладағы емхана қызметкерлері тіркеудегі науқастардың жеке сәйкестендіру нөмірін тергенде қате жібергенін мойындап отыр. 68 жастағы Ромахан Кенжебаев әзілдеп, өзін тірі әруаққа теңейді. Осыдан тура бір апта бұрын құжаттарында "жаназасы шығарылып, жерленіпті". Қаладағы емханалардың бірінің маманы оны өлілердің қатарына қосып қойған. Соның кесірінен барлық банк карточкалары бұғатталып, жүргізуші куәлігінен бастап, шетелге шығатын паспортына дейін жарамсыз болып қалған.
“Емханаға бардым. Компьютерде мені өлген деп көрсетіп тұр. Қалай? Мен тірімін ғой. "Жоқ, сен өліп қалдың". Жүгіріп ХҚКО-на бардым. Бастықтарына бардым, бәріне. Иә, айлық ала алмаймын. Барлық есепшот бұғатталған. Жұмыста да шотым бұғатта”, – дейді Ақтөбе қаласының тұрғыны Ромахан Кенжебаев.
Өзін "о дүниеге аттандырғандарды" Ромахан Кенжебаев ақыры табады. Ақтөбедегі №4 емхананың қызметкерлері өлген адамдардың тізімін жасап, жеке сәйкестендіру нөмірін компьютерге тергенде шатасқан. Соның кесірінен зейнеткер сандалып жүруге мәжбүр.
“Біздің емхана бойынша қайтыс болған адамдардың журналында компьютерге кіргізген кезде дәрігер-статистпен қателік шықты. Қателік шыққанда ЖСН-нің соңғы цифрын дұрыс жазбай, басқа цифрға ауыстырып жіберген кезде бұл ағайдың мәліметі шығып, осындай бір қателік болды”, – дейді №4 емхананың бас дәрігері Мереке Нұртазин.
Емхана басшылары кеткен қателікті мойындап, зейнеткердің бар шығынын өтейміз деп отыр. Ол үшін дәрігер-сарапшы нотариус арқылы қолхат та берді. Бірақ Ромахан Кенжебаевтің тірілер қатарына құжат жүзінде қашан қосылары белгісіз. Себебі, жаңа сәйкестендіру нөмірі беріліп, сол бойынша барлық куәлігі мен паспортын жаңалау керек.