Осыған орай Тараз қаласында 2023-2025 жылдарға арналған кешенді жоспар жасалған. Сондай-ақ инвестициялық жобалар арқылы қоғамдық көліктер қызметін сапалы ету көзделген. Міне, осы баянды бастамалар бүгінде жемісін бере бастады.
Дәл қазір Тараз қаласында 200 автобусқа қажеттілік бар. Бұл олқылықтың орнын толтыру үшін жергілікті билік жылда шаһарға 70 жаңа автобус жеткізуді жоспарлаған. Бұл межеге жету үшін тасымалдаушы компанияларға арнайы мемлекеттік субсидия да бөлінді. Нәтижесінде, қалаға алғашқылардың бірі болып «№1 Тараз автобус паркі» ЖШС-ның Zhong Tong маркалы 20 көлік жеткізіліп, олар халыққа қызмет көрсетуді бастады. Жаңа автобустардың ұзындығы 8,5 метр. Жалпы сыйымдылығы 55 адамды тасымалдауға шақталған. Бұл қоғамдық көліктер қазір № 11, 46, 28, 55 маршрут бағыттары бойынша қатынап жатыр. Сонымен қатар «ӘулиеатаТрансПасс» ЖШС алған 3 бірлік үлкен сыйымдылықты Zhong Tong маркалы автобустар №19 бағытқа қосымша қызмет көрсетуге қосылып, жүру жиілігі 14 минуттан 10 минутқа қысқарды. Жоғарыда аталған жаңа автобустардың біреуінің құны – 38 миллион теңге.
Жалпы қала тұрғындарына сапалы қызмет көрсету үшін шаһар көшелерінде кемі 460 автобус қатынауы қажет. Осы мақсатта «СапарТранс-2012» ЖШС тарапынан кемінде 10 бірлік Yutong маркалы автобустарды қыркүйек айында жеткізу қолға алынса, «ӘулиеатаТрансПасс» ЖШС тарапынан жыл аяғына дейін қосымша 25 бірлік автобус алу жоспарланған. Бұған қоса City Bus ЖШС-мен 60 бірлік автобус жеткізуге қатысты меморандум жасалған.
Тағы бір айта кетерлігі, жолаушылар бағытын ашу мақсатында жаңа 9 бағыт бойынша конкурс жарияланған. Қазір «Саяхат-99» ЖШС тарапынан №20, «ТаразТрансМоторс» ЖШС тарапынан №56 бағытқа қызмет көрсету үшін өтінім келіп түскен. Бұдан бөлек, жоспарды іске асыру аясында биыл 21 аялдама орнату жұмыстарына бюджет есебінен 55,9 млн теңге қаржы қаралған. Сонымен қатар 9 дана жарық диодты табло орнату жұмыстарына бюджет есебінен 17 миллион теңге бөлінген. Қазір жеңімпаз мердігер «Орталық диспетчерлік қызмет» ЖШС тарапынан монтаждау жұмыстары басталып кетті.
Ал жалпы 3 жыл көлемінде 120 аялдама орнату, оларға 90 бірлік жарық диодты цифрлық таблолар қою және жаңа 15 жолаушылар бағытын ашу көзделуде.
Қоғамдық көліктер мәселесінде инвестициялық жобалар да жанданып келеді. Мәселен, «Бизнеске арналған үкіметтің» фронт-офисінде өткен инвестициялық штабтың кезекті отырысында жаңа инвестициялық жобалар таныстырылды. China CAMC Engineering Co LTD компаниясының басқарма төрағасы Ван Бо өнеркәсіп пен ауыл шаруашылығы салаларындағы тығыз әрі өзара тиімді ынтымақтастыққа деген ниеттестігін білдірсе, Globia KFT компаниясының бас директоры Габор Саги жаңартылатын энергия көздері саласындағы жобасын ұсынды. Тарқатып айтсақ, аталған шетелдік компания өңірден жасыл сутегі өндірісін өндіруді қолға алмақ. Аталған сутегіні қоғамдық көліктерге арналған экологиялық таза отын өндіру пайдалануға ден қойылмақ. Жоба аясында компания аймақтан күн электр және жанармай құю стансаларын салып, сутегімен жүретін автобустарды жеткізу жоспарлап отыр. Осылайша, алдағы уақытта тараздықтарға экологиялық таза отынмен жүретін қоғамдық көліктер қызмет көрсетпек.
Иә, бұл сөз жоқ, көлік тасымалы саласына үлкен дүмпу әкелетіндігі анық. Елімізде баламасы жоқ жоба экологиялық қауіпсіздікті қамтамасыз етіп ғана қоймай, тасымал құнын да арзандата түседі.
Саятхан САТЫЛҒАН,
Жамбыл облысы