Aikyn.kz кеше жарияланған techcrunch.com сайтындағы хабарламаға сүйеніп, Әділет министрлігінің шешімін талдайды.
Бас прокурор Меррик Гарланд, Бас прокурордың көмекшісі Джонатан Кантер және Бас прокурордың орынбасары Лиза О. Монако Вашингтондағы Әділет министрлігінде өткен баспасөз мәслихатында. Фото cnbc.com сайтынан алынды. Авторлығы: Reuters / Ken Cedeno
Сәрсенбі күні (20 қараша) Әділет министрлігі Колумбия округі бойынша АҚШ округтік сотына берген өтінішінде Google-дің онлайн іздеудегі заңсыз монополиясын жою үшін компания Chrome браузерінен бас тартуы керектігін мәлімдеді. Әділет министрлігі ұсынған шаралар мақұлданса, Google-ге бес жыл бойы іздеу нарығына қайта кіруге тыйым салынады.
Бірақ соңғы үкімді округтік соттың судьясы Амит Мехта Google-дың соңғы жазасы қандай болатынын шешетін болады. Бұл шешім әлемдегі ең ірі бизнестің бірінде төңкеріс жасап, біз білетін интернет құрылымын өзгертуі мүмкін. Соттың мәселені нақты қарау кезеңі 2025 жылы басталады деп күтілуде.
Судья Мехта тамыз айында Google-ге іздеу бизнесіндегі өз мүмкіндігін асыра пайдаланған заңсыз монополия құрған деген айып тақты. Судья сонымен қатар Google-дың әртүрлі интернет шлюздерін бақылауын және компанияның әдепкі іздеу жүйесі мәртебесін сақтау үшін үшінші тұлғаларға төлемдерін қарастырды.
Әділет департаментінің соңғы өтінішінде Google-дың іздеу бизнесі үшін негізгі тарату арналары болып табылатын Android және Chrome-ға иелік етуі іздеу нарығында бәсеке орнатуда «үлкен кедергі» тудыратынын айтылды.
Прокурорлар браузерлер жасайтын немесе телефон шығаратын компаниялармен эксклюзивті келісімшарттар жасауға Google-ге тыйым салғысы келеді. Фото techcrunch.com сайтынан алынды. Авторлығы: Getty Images / Sean Gallup
Әділет министрлігі іздеу алпауытының монополиясын жоюдың басқа да әдістерін ұсынды, соның ішінде Google Android мобильді операциялық жүйесін өз басқаруынан шығарады. Өтініште Google және оның басқа серіктестері қарсылық білдіруі мүмкін екені, сондықтан құқықтық қорғауды күшейту, соның ішінде Android жүйесін іздеу бәсекелестеріне зиян келтірмейтіндей қолдану қажеттігі атап өтілген. Әділет министрлігі егер Google Android жүйесіне шектеулер қоя алмаса, оны сатуға мәжбүрлеу керек екенін де ескерткен.
Прокурорлар компанияға «браузерлер жасайтын немесе телефон шығаратын компаниялармен эксклюзивті келісімшарттар жасауға тыйым салу керек» деп есептейді.
Мысалы, Google-дың Apple-дің барлық өнімдері үшін әдепкі іздеу жүйесі болу туралы Apple-мен жасаған келісімшарты сияқты. Әділет министрлігі «Google іздеу деректерін, сонымен қатар жарнаманы басу деректерін бәсекелестермен бөлісуі керек» дейді.
Өзінің ұстанымын анықтаған Әділет министрлігі компания Chrome браузерін басқаларға сатқаннан кейін Google браузер нарығына бес жыл өткен соң ғана қайта кіруіне болатын шарттарды белгілеген.
Google компаниясы Әділет министрлігінің ұсынысы қабылданса, адамдардың Google іздеу жүйесіне кіруі қиындайды, ЖИ жарысындағы компанияның болашағына зиян тиеді деп санайды. Фото computerworld.com сайтынан алынды. Авторлығы: Shutterstock / Uladzik Kryhin
Google жауабы
Google Әділет министрлігінің соңғы мәлімдемесі АҚШ азаматтары мен елдің әлемдегі технологиялық прогресіне зиян келтіретін «радикалды интервенциялық күн тәртібі» екенін мәлімдеді.
«Әділет министрлігінің әдеттен тыс кең ұсынысы сот шешімінен асып түседі. Бұл адамдар күнделікті өмірде жақсы көретін және пайдалы деп санайтын Google өнімдерін, іздеу жүйесін бұзады», – дейді Google компаниясының жаһандық істер жөніндегі президенті және бас заң қызметкері Кент Уокер.
Уокер бұл ұсыныс пайдаланушының қауіпсіздігі мен құпиялылығына нұқсан келтіретінін, Chrome және Android сапасын төмендетіп, Google іздеуіне тәуелді Mozilla Firefox сияқты қызметтерге зиян келтіретінін де айтады. Компания президенті егер ұсыныс қабылданса, бұл адамдардың Google іздеу жүйесіне кіруін қиындатады, ЖИ жарысындағы компанияның болашағына зиян тигізеді деп санайды.
«Әділет министрлігінің көзқарасы америкалық тұтынушыларға, әзірлеушілерге және шағын бизнеске зиян келтіретін және Американың жаһандық экономикалық және технологиялық көшбасшылығына ең қажет кезде қауіп төндіретін бұрын-соңды болмаған үкіметтің шектен шығуына әкеледі», – дейді ол.
Компания Әділет министрлігінің талаптарына келесі айда жауап бермекші. Сәрсенбі күнгі өтініш прокурорлар Google-дың құрамынан Chrome браузерін бөліп шығаруға мәжбүрлеуді қарастырып жатқаны туралы бұрынғы ақпаратты растайды. StatCounter веб-трафик қызметінің мәліметтері бойынша, Chrome браузері АҚШ браузерлер нарығының 61%-ын бақылайды. Бұндай монополиялық артықшылық үкіметтік шенеуніктерге ұнамайтыны белгілі болды.
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.