Reuters хабарламасына сүйенген Aikyn.kz жаңартылған әскери қызмет туралы заңының Германияға не үшін қажет болғанын талдайды.
Германияның қарулы күштері жақында жаңартылған әскери қызмет туралы заңдағы әскерге шақыру жасындағы ер азаматтардың елден үш айдан ұзақ мерзімге шығуы үшін рұқсат алуын талап ететін ережені нақтылау үстінде. Бұл туралы Қорғаныс министрлігі мәлімдеді.
Заң қаңтар айында күшіне енді. Алайда Еуропалық одақтағы халқы ең көп елдегі 17 мен 45 жас аралығындағы миллиондаған ер адамға теориялық тұрғыдан әсер ететін бұл талап көпшілік назарынан тыс қалған.
Қорғаныс министрлігінің өкілі Германияда әскери қызметтің ерікті екенін ерекше атап өтті. Оның айтуынша, министрлік «артық бюрократияны болдырмау үшін, соның ішінде рұқсат алу талабынан босатудың арнайы ережелерін әзірлеп жатыр».
Даулы жаңа әскери міндет туралы заң былтыр Бундесвер санын арттыру және НАТО алдындағы мақсаттарға жету үшін қабылданған. Бұл Германияның АҚШ-қа шамадан тыс ұзақ сүйеніп келгені туралы пікір мен Ресеймен арадағы шиеленістің күшеюі аясында жүзеге асқан. Қорғаныс министрлігінің өкілі электрондық хатында бұл заңнама әскери қызметке жататын азаматтарды тіркеудің сенімді әрі нақты жүйесін қамтамасыз етуге бағытталғанын айтады.
«Төтенше жағдай туындаса, біз кімнің ұзақ уақыт шетелде болуы мүмкін екенін білуіміз керек», – дейді ол.
Ол бұл рәсімнің түпкілікті қалай орындалатыны жөнінде қосымша түсініктеме беруден бас тартқан. Германия 2035 жылға қарай белсенді әскери қызметшілер санын қазіргі 183 мыңнан 260 мыңға дейін өсіруді жоспарлап отыр. Германия канцлері Фридрих Мерц елдің өзін қорғай алатын деңгейге тезірек жетуі керектігін және оған сарбаздар қажет екенін айтқан. Өткен демалыста оппозициялық саясаткерлер үкіметті заңнамада түсінбеушілік тудырды деп сынға алды.